Усяго патроху11

Еўропу пачала заваёўваць новая гародніна — цукіёла. Што гэта такое і калі чакаць у Беларусі?

Цукіёла — гэта выведзены іспанскімі селекцыянерамі гібрыд кабачка і агурка, які пачаў заваёўваць сусветны рынак. Вонкава падобны на маленькі гарбуз, цукіёла ўжо з'явіўся на прылаўках нават у Польшчы, піша Telegraf.news.

Біятэхнолагі з групы Beyond Seeds і Інстытута даследаванняў і адукацыі ў галіне сельскай гаспадаркі і рыбалоўства ў Іспаніі вялі працу над стварэннем новай гародніны цягам пяці гадоў.

Цяпер ужо існуе тры сарты цукіёла, якія можна адрозніць па колерах: зялёным, светла-зялёным і жоўтым. Жоўты, па водгуках спажыўцоў, самы салодкі.

Камусьці можа здацца, што гэта новая разнавіднасць цукіні, але ўсярэдзіне гэтая гародніна больш падобная да агурка.

Па словах селекцыянераў, яны скрыжавалі мадыфікаваную версію кабачка з агурком, каб стварыць больш духмяны плод са смакавымі якасцямі агурка, які быў бы больш устойлівы да захоўвання. І ў іх атрымалася. Цукіёла можна захоўваць ад 3 да 4 тыдняў без халадзільніка.

За сваю інавацыйную гародніну іспанская кампанія Unica Fresh нават атрымала ўзнагароду на найбуйнейшай сусветнай плодаагародніннай выставе Fruit Logistica-2024 у Берліне. Навінка, як і класічны кабачок, прыдатная для вырошчвання ў краінах з умерана цёплым кліматам, што дае ёй перспектывы заваяваць сэрцы дачнікаў і фермераў.

Як адзначылі стваральнікі, цукіёла можна ёсць у сырым і гатаваным выглядзе. Лупіны плоду таксама прыдатныя ў ежу. Гародніна багатая клятчаткай, вітамінамі А, B і C і антыаксідантамі. Таксама цукіёла змяшчае мноства розных мінералаў. Ён багаты кальцыем, жалезам, ёдам, магніем, фосфарам, натрыем і асабліва каліем.

Цукіёла лёгказасваяльны, мае лёгкую і далікатную тэкстуру, што сярод іншага робіць яго выдатнай крыніцай харчавання для дзяцей і пажылых людзей.

Гэты плод з'яўляецца цалкам новай гароднінай на сусветным рынку, але яго ўжо можна купіць у некаторых крамах суседняй Польшчы.

Напрыклад, ён быў заўважаны ў папулярнай сетцы крам «Бедронка». Там за агароднінную навінку просяць 3,99 злотых за штуку, што эквівалентна 3,23 беларускім рублям. Вырошчвае і пастаўляе цукіёла іспанская кампанія Beyond Seeds.

Што да Беларусі, то з 2022 года ў ёй дзейнічае эмбарга на ўвоз прадукцыі з «недружалюбных» краін. У ліку такіх прадуктаў сярод іншага спачатку апынуліся садавіна і гародніна з краін ЕС. Пазней, аднак, спіс падкарэктавалі, і цяпер беларусы могуць бачыць на прылаўках айчынных крам садавіну і гародніну з Іспаніі, напрыклад, брокалі, авакада, клеменціны і нават кумкват.

Тым не менш разлічваць на хуткае з'яўленне цукіёла ў Беларусі, відаць, не варта. Гародніна толькі-толькі пачала заваёўваць рынак у Еўропе, а прадукцыя Beyond Seeds у Беларусь пакуль не пастаўляецца. Аднак з ростам папулярнасці цукіёла ў будучыні ён, напэўна, будзе дасяжным і для беларусаў.

Каментары1

  • чакайце
    22.06.2024
    а я яшчэ баршчавік не даела

Цяпер чытаюць

Памятаеце бяздомнага блогера, які пасля пратэстаў перабраўся ў Польшчу? Цяпер ён жыве на Лазурным беразе

Памятаеце бяздомнага блогера, які пасля пратэстаў перабраўся ў Польшчу? Цяпер ён жыве на Лазурным беразе

Усе навіны →
Усе навіны

Міністр абароны Германіі заклікаў еўрапейцаў ехаць да Пуціна ў Маскву9

УСУ вызвалілі 14 вёсак на Харкаўшчыне. Аперацыя «Мядзведжы капкан» праходзіла ў рэжыме поўнай сакрэтнасці7

Памёр мастак Юрый Несцярук

У Івана-Франкоўскай вобласці расійская ракета прабіла дах дома, але не выбухнула ФОТА

Пад антарктычнымі льдамі знайшлі сляды гор, якія дапамаглі эвалюцыі

У Жлобінскім раёне машына наляцела на каня. Кіроўцу давялося з салона выразаць2

Пуцін заклікаў украінцаў пераходзіць «на правільны бок гісторыі»11

Рабіць вагоны для мінскага метро зноў хочуць даручыць «Штадлеру»6

«Белтэлекам» зноў аб'явіў пра павышэнне сваіх тарыфаў

больш чытаных навін
больш лайканых навін

Памятаеце бяздомнага блогера, які пасля пратэстаў перабраўся ў Польшчу? Цяпер ён жыве на Лазурным беразе

Памятаеце бяздомнага блогера, які пасля пратэстаў перабраўся ў Польшчу? Цяпер ён жыве на Лазурным беразе

Галоўнае
Усе навіны →

Заўвага:

 

 

 

 

Закрыць Паведаміць