Масква абяцае дапамогу Мінску на выбарах 2025 года «ў выпадку дэстабілізацыі»
Расія акажа Мінску дапамогу ў выпадку спроб дэстабілізацыі сітуацыі падчас прэзідэнцкіх выбараў у 2025 годзе, калі Беларусь пра гэта папросіць, заявіў у інтэрв'ю РИА Новости пасол РФ у Мінску Барыс Грызлоў. Таксама ён падтрымаў масавыя рэпрэсіі ў краіне пасля 2020 года.
«Няма ніякіх падстаў меркаваць, што беларускім праваахоўнікам і спецслужбам спатрэбіцца дадатковая дапамога, як прынята гаварыць, «на зямлі». Яны выдатна спраўляюцца са сваімі задачамі. Але калі спатрэбіцца — Расія ў рамках сваіх абавязацельстваў, безумоўна, акажа дапамогу і падтрымку, пра якую нас папросіць наш бліжэйшы саюзнік і стратэгічны партнёр», — сказаў Грызлоў.
Ён зазначыў, што «профільныя ведамствы Расіі і Беларусі вядуць пастаянны абмен інфармацыяй па аператыўных каналах». «Мы ў рэжыме рэальнага часу дзелімся звесткамі аб любых патэнцыйных пагрозах», — падкрэсліў ён.
Пры гэтым Грызлоў, які расказаў пра гатоўнасць Расіі ўмяшацца ў беларускія выбары, заявіў пра «нездаровую цікавасць», якую краіны Захаду праяўляюць да ўнутрыпалітычных і, у прыватнасці, электаральных працэсаў у Расіі і Беларусі.
«Было б дзіўна, калі б нашы агульныя сапернікі не планавалі нейкіх правакацыйных дзеянняў (у перыяд прэзідэнцкіх выбараў у Беларусі ў 2025 годзе — рэд.), — лічыць Грызлоў. Вядома, мы зыходзім з таго, што такія спробы будуць прадпрымацца».
Грызлоў заявіў, што «пасля спробы так званай апазіцыі захапіць уладу ў 2020 годзе праваахоўныя органы і спецслужбы Рэспублікі Беларусь правялі каласальную работу, якая накіравана на спыненне такога роду злачынных дзеянняў у будучым».
«Вінаватыя — тыя, хто не паспелі ганебна бегчы ў Польшчу і Прыбалтыку — былі хутка ідэнтыфікаваны і панеслі заслужанае пакаранне. Пры гэтым выявіліся літаральна ўсе іх планы, схемы фінансавання, структура кіравання, сетка агентаў уплыву, спосабы і каналы сувязі, метадычкі і інструкцыі па арганізацыі незаконных пратэстаў, дыверсій з выкарыстаннем узрыўчаткі і зброі, а таксама сілавых акцый», — сказаў ён.
Ён дадаў, што гэта «не значыць, што заходнікі не паспрабуюць зладзіць чарговую правакацыю». «Такія намеры спыняліся беларускімі спецслужбамі і пасля 2020 года», — нагадаў пасол.
Масавыя палітычныя рэпрэсіі ў Беларусі працягваюцца з 2020 года, калі выбары суправаджаліся нерэгістрацыяй і арыштамі праціўнікаў Лукашэнкі і назіральнікаў на выбарчых участках. Нягледзячы на гэта, Аляксандр Лукашэнка, мяркуючы са звестак з участкаў, дзе выбарчыя камісіі дазволілі назіральнікам сачыць за падлікам галасоў, прайграваў Святлане Ціханоўскай, але не аддаў улады.
Рэжым пераследуе ўсіх, хто публічна выступаў супраць іх кіравання і супраць расійскага кантролю над Беларуссю. З 2022 года, пасля нападу Расіі на Украіну, беларусаў пачалі пераследаваць таксама за антываенныя выказванні або сімпатыі да Украіны.
Згодна з інфармацыяй прадстаўніка Аб'яднанага пераходнага кабінета Паўла Латушкі, з 2020 года рэпрэсіі закранулі 136 тысяч чалавек.
Каментары