Сталі вядомыя дэталі абвінавачання ўкраінскага дэпутата Шаўчэнкі, які праславіўся падтрымкай Лукашэнкі

Крымінальную справу супраць Яўгена Шаўчэнкі завялі 11 лістапада. Яму пагражае ад 12 да 15 гадоў зняволення з канфіскацыяй або без канфіскацыі маёмасці за дзяржаўную здраду.

Справу Шаўчэнкі вядуць следчыя Дзяржаўнага бюро расследаванняў — менавіта гэтая ўстанова мае паўнамоцтвы займацца справамі, у якіх фігуруюць дзяржаўныя чыноўнікі.

Якія эпізоды згадваюцца ў справе

Як адзначаецца ў рашэнні суда аб узяцці Шаўчэнкі пад варту, дэпутат імкнуўся да «ўзмацнення ўласнага палітычнага становішча ва Украіне» і «свайго матэрыяльнага ўзбагачэння» і для гэтага не пазней за 1 верасня 2020 года пачаў дапамагаць «замежнай дзяржаве і яе прадстаўнікам» весці падрыўную дзейнасць супраць Украіны.

Такую дапамогу, паводле следства, ён ажыццяўляў праз сваю інфармацыйную дзейнасць, накіраваную на «прапаганду і распальванне ва ўкраінскім грамадстве антыўрадавых і прарасійскіх настрояў». Свае матэрыялы, у якіх навязвалася негатыўнае стаўленне да дзейнай украінскай улады і нейтральнае — да Расіі, ён размяшчаў у СМІ, у тым ліку беларускіх, у сацыяльных сетках і на сваім канале ў YouTube.

«У жніўні 2021 года, знаходзячыся на тэрыторыі Беларусі, сустракаўся з прадстаўнікамі дзелавых, палітычных структур і палітычным кіраўніцтвам Рэспублікі Беларусь і са спасылкай на іх распаўсюджваў ідэю адсутнасці пагрозы нападу расійскіх войскаў з тэрыторыі Беларусі, а таксама пераконваў беларускага прэзідэнта, што зробіць усё, каб забяспечыць мір ва Украіне», — адзначаецца ў дакуменце, які ёсць у распараджэнні «Радыё Свабода».

Пры гэтым следчыя падкрэслілі, што Яўген Шаўчэнка дакладна ведаў аб правядзенні сумесных беларуска-расійскіх вайсковых вучэнняў на тэрыторыі Беларусі з 2021 года да 23 лютага 2022-га, «пад прыкрыццём якіх былі сфарміраваныя расійскія батальённыя і ротныя тактычныя групы і атрады спецыяльнага прызначэння», што 24 лютага 2022 года ўдзельнічалі ў ваеннай агрэсіі з беларускай тэрыторыі.

«Разумеючы цесныя сувязі і ўзаемадзеянне РФ і РБ […], усведамляючы, што РФ выкарыстоўвае РБ і яе прадстаўнікоў для інфармацыйнай барацьбы супраць Украіны, Шаўчэнка Яўген здзяйсняў дзеянні, накіраваныя на аслабленне абараназдольнасці праз выкарыстанне свайго статусу народнага дэпутата Украіны шляхам распаўсюджвання ў інфармацыйнай прасторы матэрыялаў для ўкаранення ў грамадскую думку грамадзян Украіны прарасійскіх настрояў», — гаворыцца ў дакуменце.

Сярод доказаў — фільм, паказаны ў Беларусі на тэлеканале АНТ

У матэрыялах справы як доказ фігуруе фільм «Беларусь вачыма Яўгена Шаўчэнкі», які 15 студзеня 2022 года паказалі па беларускім тэлеканале АНТ. У ім, паводле следчых, дэпутат Вярхоўнай Рады Украіны распаўсюджваў інфармацыю, «накіраваную на дыскрэдытацыю ўсталяванага ва Украіне палітычнага і эканамічнага ладу» і сцвярджэнне ў масавай свядомасці думкі аб адсутнасці ваеннай пагрозы для Украіны з боку Беларусі.

Пры гэтым, паводле следства, Яўген Шаўчэнка спрабаваў пераканаць украінцаў, што рашэнні ўкраінскай улады «папярэдзіць такія пагрозы» накіраваныя на тое, каб узмацніць недавер паміж украінцамі і беларусамі і выклікаць абурэнне. Дэпутат таксама называў адпаведныя дзеянні ўлады Украіны «няслушнымі, неабгрунтаванымі і эканамічна стратнымі» і выступаў за неабходнасць «аднаўлення дружбы ўкраінскага і беларускага братэрскіх народаў». Імаверна, маюцца на ўвазе ўведзеныя Украінай палітычныя і эканамічныя абмежаванні на палітычныя кантакты з Беларуссю пасля выбараў 2020 года і прымусовай пасадкі самалёта Ryanair.

У канцы кастрычніка і пачатку лістапада 2024 года на сваім YouTube-канале (цяпер ужо заблакіраваным) украінскі дэпутат размясціў яшчэ некалькі відэазапісаў. У іх ён працягваў дыскрэдытаваць украінскую ўладу, Захад, еўрапейскія каштоўнасці, заяўляў, што Захад умешваецца ва ўнутраныя справы Украіны, спрычыніў вайну і спрабуе шляхам уплыву падарваць стабільнасць у Грузіі і Малдове. Паводле Яўгена Шаўчэнкі, украінская ўлада «падпарадкоўваецца Захаду, які праводзіць каланіяльную палітыку ў дачыненні да Украіны і іншых краін», парушае права на свабоду слова і пераследуе палітычных апанентаў. Ён выступаў за вяртанне Украіны ў зону «палітычнага і эканамічнага ўплыву Расіі», каб вярнуць свае тэрыторыі.

Як на гэтыя абвінавачанні адрэагавалі Шаўчэнка і яго адвакат

Адвакат заявіў, што расцэньвае агучаныя ў судзе доказы дзяржаўнай здрады Яўгена Шаўчэнкі як спрэчныя. Паводле яго, у матэрыялах справы адсутнічаюць кантакты «прадстаўнікоў варожых краін», а таксама доказы атрымання эканамічнай выгады, на якую нібыта разлічваў дэпутат.

Сам Яўген Шаўчэнка заявіў, што падтрымлівае тэрытарыяльную цэласнасць Украіны.

• 6
• 0
• 0
• 0
• 1
• 0
• 0
• 0