4 фільмы, якія сабралі найбольш сімпатый на кінафестывалі «Паўночнае ззянне»
У лістападзе прайшоў юбілейны X кінафестываль «Паўночнае ззянне». Якія стужкі адзначыла журы і гледачы?
Самым папулярным фільмам фестывалю стаў нарвежскі док «Песні Зямлі» (рэж. Маргрэт Олін, Нарвегія, 2023). Ён сабраў 761 прагляд на online-платформе кінафэсту.
У рамках фэсту было таксама некалькі афлайн-паказаў кіно ў Вільнюсе, Таліне і ў Варшаве. Іх наведала больш за 600 чалавек.
Якія ж фільмы сталі пераможцамі?
Беларускі конкурс
Фільмы Беларускага конкурсу аглядала міжнароднае журы, у склад якога сёлета ўвайшлі эстонская кінапрадзюсарка Марыянэ Острат, рэжысёрка, кінапрадзюсарка і дырэктарка кінафестывалю goEast Гэлеэн Хэрытсэн і беларуская рэжысёрка і журналістка Ганна Бадзяка. Журы аднагалосна вырашыла прысудзіць узнагароду за найлепшы фільм Беларускага конкурсу стужцы «Пад шэрым небам» рэжысёркі Мары Тамковіч. Ён натхнёны лёсам зняволенай журналісткі «Белсата» Кацярыны Андрэевай і яе мужа Ігара Ільяша..
«Праз разумныя і ўпэўненыя мастацкія выбары рэжысёрка дае нам прымераць боты смелай беларускай журналісткі, арыштаванай за вядзенне трансляцыі з жорсткага падаўлення мірных пратэстаў. Мы разумеем і ўхваляем экзістэнцыйны выбар галоўнай гераіні і спачуваем яе мужу, пакуль яна працягвае змагацца з дзяржавай, якая разбурае іх ранейшае сямейнае жыццё», — патлумачыла выбар журы.
Спецыяльнымі згадкамі гэтаксама адзначаныя два фільмы: «Непажаданае сваяцтва» Паўла Мажара і «Працэсы» Андрэя Кашперскага.
Міжнародны конкурс дэбютаў
Ацэньвалі фільмы Міжнароднага конкурсу дэбютаў рэжысёрка Саша Кулак, прадзюсарка і проджэкт-менеджарка B2B Doc Ілья Стэнберг і прадзюсарка і дырэктарка HER Docs Марта Гольба-Наўман. Перамог фільм «Г — Гатсунда ў 21 дзеі» рэжысёра Лорана Баці.
«Пакідаць месца, якое вызначыла цябе як асобу, ніколі не проста. Рэжысёр апісвае гэтае падарожжа з глыбокай эмацыйнасцю, запрашае нас у інакш недасяжны свет, — растлумачыла свой выбар журы. — Ён расшуквае сяброў з мінуўшчыны, малюючы іх так, як мала хто змог б — з шчырасцю, якая паказвае, як іх выбары вызначае складаная сумесь эмоцый і супадзенняў, — і выстаўляе братэрства ва ўсім яго голым харастве і складанасці».
Спецыяльнай згадкай былі адзначаныя дзве стужкі: «Balomania» (рэж. Сісэль Морэл Даргіс) і «Палаючы рай» (рэж. Міка Густаўсон).
Конкурс кароткага метра SHORTCUT
Гэты конкурс сёлета прайшоў упершыню. Міжнароднае журы, у складзе якога агентка па продажах і сузаснавальніца ShortsFit Люцыла Рыджыа, рэжысёр-дакументаліст Арцём Лобач і дарадца міжнароднага аддзела арганізацыі Finnish Film Foundation Ота Сууронен, узнагародзіла стужку «Лазневы дзень» (рэж. Ганна Хінтс і Тушар Пракаш).
«У пары жыцця раскрываецца тонкая і прыгожая гісторыя пра магчымасць любові і клопату між мужчынамі. Фільм пра невымоўнае, элегантна зняты ў гарачай сауне, са змрочнымі ценямі на сценах і па-імпрэсіянісцку потнымі буйнымі планамі галінак, што рытмічна гойдаюцца. Гледачы могуць адчуць глыбокае паразуменне і напружанне ў героях і атачэнні фільма. Сінергія парнага асяроддзя, глыбокіх пачуццяў і асабістых гісторый раскрывае тонкасць і хараство невымоўнага», — каментуюць свой выбар журы.
Спецыяльнай згадкай адзначаны фільм «Умяшанне» (рэж. Гунур Марцінсдоўцір Шлютар) і акцёрская праца Яна Гунара Ройсэ («Нарвежскае патомства»).
Гледачы таксама маглі абраць фільм-фаварыт. Па выніках галасавання пераможцай глядацкіх сімпатый стала стужка «Раб танца» — сюррэалістычны скетч, у якой вусаты юнак стараецца займацца справай, якую шчыра любіць.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі73
Каментары