У Прыднястроўі спыненыя прамысловыя прадпрыемствы пасля адключэння расійскага газу
Па словах мясцовых уладаў, працуюць толькі харчовыя прадпрыемствы.
Віцэ-прэм'ер і кіраўнік Мінэканамразвіцця Прыднястроўя Сяргей Абалонік расказаў пра энергетычны крызіс у непрызнанай дзяржаве.
З ім Прыднястроўе сутыкнулася пасля спынення паставак расійскага газу з 1 студзеня.
Па словах віцэ-прэм'ера, стаяць усе прамысловыя прадпрыемствы за выключэннем харчовых,
пішуць «Навіны Прыднястроўя».
Да 5 студзеня будзе ясна, колькі энергіі спажывае бытавы сектар. Баланс пакажа, што можна накіраваць на патрэбы прадпрыемстваў.
Абалонік запэўнівае, што на бягучы момант сітуацыя кіраваная, але калі не вырашыць праблему з пастаўкамі газу, прадпрыемствы страцяць магчымасць перазапусціцца.
Мясцовы навіновы партал паведамляе, што з-за газавага крызісу ў Прыднястроўі ад сістэмы цеплазабеспячэння адключылі 131 школу, 147 дзіцячых садкоў, 130 адміністрацыйных будынкаў органаў дзяржаўнай улады і кіравання. Студэнты Прыднястроўскага дзяржуніверсітэта ім. Т. Г. Шаўчэнка будуць здаваць сесію анлайн. Пасля зімовых канікул усе прыднястроўскія школьнікі таксама пяройдуць на дыстанцыйную форму навучання.
Нагадаем, з 1 студзеня 2025 года Украіна спыніла транзіт расійскага газу. Жыхары непрызнанага Прыднястроўя — прарасійскай часткі Малдовы, непадкантрольнай Кішынёву — засталіся без газу, цяпла і гарачай вады. Выключэнне зроблена для бальніц і сацыяльных устаноў.
У шматкватэрных дамах Прыднястроўя газ пакуль застанецца даступным для прыгатавання ежы. Гэта будзе магчыма дзякуючы запасам у сістэме газаправодаў, пакуль ціск у сетцы не знізіцца да крытычнага ўзроўню.
Электраэнергія ў Прыднястроўі пакуль застаецца. Мяркуецца, што запасаў вугалю на Малдаўскай ГРЭС хопіць яшчэ на 50 дзён працы.
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА21
Каментары