Працоўныя мігранты праблемы эканомікі Беларусі не вырашаць, і Лукашэнка пачаў гэта разумець. Меркаванне Чалага

Нядаўна Аляксандр Лукашэнка назваў выклікам вымушаную міграцыю людзей. Праўда, гаварыў ён не пра беларусаў, якія з'язджаюць з краіны, а замежнікаў, якія прыязджаюць працаваць.

«Падцягваюцца людзі, якія хочуць жыць, працаваць, зарабляць і нейкую капейку пасылаць на радзіму, каб пракарміць сваіх дзяцей. Але ўся бяда ў тым, што гэтыя людзі далёкія ад тых спраў, якія мы вырашаем. Яны некампетэнтныя. Яны прафесійна не падрыхтаваныя», — заявіў Лукашэнка.

Эканаміст Сяргей Чалы ў новым выпуску сваёй праграмы пракаментаваў гэтыя словы:

«Нічога сабе, вось так вось па эмігрантах. Ну добра, ад Трампа можна такое пачуць, што туды [у ЗША] «Мексіка пасылае толькі сваіх злачынцаў і гвалтаўнікоў».

Па словах эканаміста, гэтыя словы — першае прызнанне на ўзроўні Лукашэнкі таго, што «ідзе skills mismatch у эканоміцы». Так называюць сітуацыю ў эканоміцы, калі навыкі, якімі валодаюць работнікі, не адпавядаюць патрабаванням рынку працы. У выніку ў эканоміцы недахоп работнікаў, хоць і ёсць прыток працоўнай сілы.

Чалы заўважае, што пра гэту праблему даўно гаварылі. Ён нагадвае словы намесніцы міністра эканомікі Беларусі Таццяны Бранцэвіч:

«Некаторыя краіны кампенсуюць недахоп нацыянальных працоўных рэсурсаў за кошт міграцыі. Досыць распаўсюджаная стратэгія. Але неадназначная з пункту гледжання выніку. Проста праз тое, што для прарыўнога развіцця неабходныя кваліфікаваныя кадры. А іх, па вялікім рахунку, не хапае і ў большасці краін — патэнцыяльных рэцыпіентаў.

Таксама існуюць цяжкасці з адаптацыяй мігрантаў з далёкіх рэгіёнаў. Іх паўнавартаснае інтэграванне ў новае культурнае асяроддзе патрабуе і часавых, і фінансавых, і маральных высілкаў».

Чалы тлумачыць, чаму працоўныя мігранты не змогуць вырашыць праблемы недахопу кваліфікаваных кадраў на рынку працы Беларусі:

«У краіну людзі імігруюць па дзвюх прычынах (калі толькі гэта не тыя, хто бяжыць ад вайны) — гэта ці працаваць і жыць лепш, чым у сябе на радзіме, ці ехаць па «вэлфер» (welfare, сацыяльныя выплаты. — НН). У першым выпадку, гэта як правіла, Амерыка, у другім — Еўропа. Але ў нас жа няма ні таго, ні другога».

Днямі Лукашэнка зноў паблажліва выказаўся пра мігрантаў з Усходу.

«Хочаш запрасіць таджыкаў, узбекаў, казахаў, сірыйцаў, афганцаў, любых людзей, запрашай. Але ты павінен ведаць, што гэта за людзі і што яны табе патрэбныя на гэтым месцы і могуць гэтую аперацыю ажыццяўляць. Не ўмеюць — навучы. Але ты за гэты дзясятак-дваццаць чалавек павінен галавой адказваць», — запатрабаваў палітык.

Але пасля на сайце Лукашэнкі замест цытаты з пералікам нацыянальнасцяў напісалі, што гаворка пра безаблічных «замежных грамадзян».

• 6
• 0
• 7
• 6
• 0
• 0
• 0
• 0