Міліцыя выпадкова выклала ўнутраны дакумент з аналізам медыя. Вось каго яны сёння чыталі і якія СМІ лічаць незалежнымі

Канал «50 адценняў праўды/хлусні» з'явіўся ў ліпені 2020 года і паліваў брудам Сяргея Ціханоўскага і аб'яднаны штаб апазіцыі, у які тады ўваходзіла Святлана Ціханоўская. Час ад часу там з'яўляюцца «інсайды» кшталту асабістых перапісак, якія могуць быць толькі ў сілавікоў.

У апублікаваным і адразу ж выдаленым дакуменце «агляд СМІ па стане на 16:00 23.01.2025» крыніцы інфармацыі разбітыя на тры групы. Гэта «незалежны парадак дня», «дзяржаўны парадак дня», а таксама раздзел «У адносінах да электаральнай кампаніі».

У незалежных за сёння былі наступныя навіны:

• Blizko.by з тэмай пра тое, што мінчане могуць паскардзіцца на завышэнне цэн або недахоп тавараў,
• навіна з тэлеграм-канала «Баста» пра тое, што таварныя знакі «Бусліка» будуць прадаваць,
• тэлеграм-канал «Мінск. Галоўнае!» з навінай пра яўку падчас датэрміновага галасавання,
• Digital Intelligence Team з навінай пра бальніцу КДБ за 16 мільёнаў даляраў,
• тэлеграм-канал Blizko.by з навінай пра тое, што кандыдат-спойлер Сыранкоў прапануе замяніць пасаду прэзідэнта на пасаду старшыні,
• канал US Today/Соединенные Штаты Сегодня пра тое, што ў Бостане пабачылі плакаты ў падтрымку Лукашэнкі,
• REFORM.news з навінай пра ўцечку азота з трубаправода,
• EX-PRESS.LIVE за навінай пра дрэнную хурму з крамаў.

У дзяржаўнага парадку дня:

• тэлеграм канал «Пул першага» з навінай пра дзяржаўныя знакі якасці ад Лукашэнкі,
• тэлеграм-канал Мінгарвыканкама з навіной пра Ноч адкрыццяў у нацыянальнай бібліятэцы ды навіной пра «Марафон адзінства»,
• тэлеграм-канал Беларускага дзяржаўнага ўніверсітэта з навіной пра тое, што міністр адукацыі Іванец сустрэўся з рэктарам, супрацоўнікамі ды студэнтамі БДУ,
• расійскі сайт Sputnik Беларусь, які напісаў пра тое, што цэлых 15 беларусаў прыехалі прагаласаваць з-за мяжы.

У адносінах да электаральнай кампаніі адзначаная сённяшняя фэйкавая рассылка ГУБАЗіКа (відаць, прэс-служба не ўдзельнічае ў такіх аперацыях і таму не ведае, што гэта праца саміх сілавікоў). Таксама адзначаныя два каментары з тэлеграм-чатаў:

• каментар карыстальніка ў чаце «Уручча»: «Нядобранадзейнае спадарства, а да некага ўжо прыходзілі мянты для прафілактычнай гутаркі перад выбарамі? Да мяне ранкам прыйшлі, праўда, не засталі. Давялося вызвоньваць мяне і настойліва прасіць сустрэчы. Пагадзіўся пад'ехаць да іх у Першамайскі РАУС».
• і каментар у чаце «Мінск мір чат»: «Абавязкова прагаласуйце, а то Санечка ваш улюблёны не пераможа на выбарах».

У цэлым, агляд СМІ складзены даволі акуратна. Па ўсім відаць, што робіцца ён не для прапаганды, а для таго, каб кіраўніцтва МУС атрымлівала агляд таго, што пішуць.

• 2
• 0
• 40
• 8
• 0
• 0
• 2
• 0