На X-старонцы Белага дома на Трампа надзелі каралеўскую карону. Гэта здзеклівы адказ апазіцыі
Белы дом паведаміў, што адміністрацыя Дональда Трампа адмяніла ўведзеную папярэднім прэзідэнтам Джо Байдэнам «плату за заторы» ў Нью-Ёрку. Паведамленне аформлена ў форме, здзекліва-прыніжальнай для ўнутранай амерыканскай апазіцыі.
Рашэнне Трампа адмяняе ўведзеную з 5 студзеня гэтага года аплату за ўезд у самы перагружаны раён Нью-Ёрка: $2,25 ноччу і да $9 у гадзіну пік. Гэты план быў скіраваны на скарачэнне трафіку і забруджвання паветра.
У сваю чаргу, ягоныя крытыкі сцвярджалі, што ён даставіць нязручнасці пасажырам, якія прыязджаюць у Нью-Ёрк на працу. «Кожны амерыканец павінен мець доступ да Нью-Ёрка незалежна ад сваіх эканамічных магчымасцяў. Ён не павінен быць горадам для абраных», — сцвярджае Дональд Трамп.
«Плата за заторы мёртвая. Манхэтэн і ўвесь Нью-Ёрк выратаваны. Няхай жыве кароль!», — пафасна напісаў Трамп у сваёй сацсетцы Truth.
Пасля на старонцы Белага дома ў сацсетцы X паведамленне Трампа з'явілася ў суправаджэнні нібыта вокладкі часопіса з прэзідэнтам ЗША з каралеўскай каронай на галаве.
Для таго, каб разумець, што гэта азначае, трэба ведаць унутраны кантэкст сучаснага амерыканскага палітычнага жыцця.
17 лютага ЗША адзначылі традыцыйны Дзень прэзідэнтаў, раней вядомы як Дзень нараджэння Джорджа Вашынгтона. Амэрыканская апазыцыя абвясціла гэтае свята «днём без каралёў» і выйшла на мітынгі па ўсёй краіне, у тым ліку і ў Вашынгтоне і Нью-Ёрку.
Апаненты скарысталіся з гэтай магчымасцю, каб выступіць супраць самавольства выканаўчых загадаў Трампа і дзеянняў мільярдэра Ілона Маска, накіраваных на скарачэнне федэральнага ўрада.
«У Амерыкі няма караля. Трамп і ягоныя багатыя сябры падрываюць Канстытуцыю і вяршэнства права, каб разарваць на часткі нашы дэмакратычныя інстытуты і супольнасці», — адзначылі арганізатары мерапрыемства.
Згадка пра караля ў пасце Трампа і наступная карцінка ў акаўнце Белага дома — здзеклівы адказ на гэтыя словы.
Цяпер чытаюць
Слесар з Оршы бегаў ад войска на радзіме, каб пасля памерці за Пуціна. Перад адпраўкай на забой для яго закацілі дыскатэку з афрыканцамі21
Слесар з Оршы бегаў ад войска на радзіме, каб пасля памерці за Пуціна. Перад адпраўкай на забой для яго закацілі дыскатэку з афрыканцамі
Пасол Украіны па пытаннях Беларусі адказаў на дыскусію Вячоркі і крытыкаў Ціханоўскай: Ваша ўзаемная непрымальнасць адыгрывае вельмі неканструктыўную ролю4949
Каментары