«А ёсць спецыяльнасць «Галя, адмена»?» Тыкток жартуе з таго, як у Смілавіцкім каледжы вучаць прадаўцоў
Настаўніца са Смілавіцкага каледжа паказала, як у іх вучаць на прадаўцоў. Відэа сабрала ўжо каля двух мільёнаў праглядаў.
У Смілавіцкім каледжы адна з вучэбных аўдыторый абсталявана як вучэбная крама: ёсць прылаўкі з таварамі, сапраўдная каса і кошыкі для тых вучняў, якія на занятку выконваюць ролю пакупнікоў.
Пакуль настаўніца распавядае, як яны вучаць прадаўцоў і кантралёраў-касіраў 4 разраду, дзяўчаты сумна гуляюць у касірку і пакупніцу. Адна кладзе пустыя скрынкі з-пад соку, другая іх прабівае на касе.
За суткі відэа набрала 1,8 мільёна праглядаў і больш за 65 тысяч лайкаў. А ў каментарыях, здаецца, сабраліся стэндаперы-пачаткоўцы, каб пратэсціраваць жарты: «Дык іх вучаць з такім незадаволеным тварам сядзець на касе? Я думала, гэта з часам з’яўляецца», «У мяне ў садочку такая крама была, там усе веды і атрымала».
Нехта адзначыў, што сімулятар дрэнны, бо пакупнікі павінны абурацца тым, што цэны ў зале і на касе не супадаюць і пагражаць напісаць скаргу. А хтосьці абурыўся, што нават у каледжы працуе ўсяго адна каса.
У каментарыях людзі дзяліліся ўласным досведам і пісалі, што калі прыйшлося некаторы час падпрацоўваць у краме, дык на месцы ўсяму навучылі за некалькі дзён. А кагосьці і ўвогуле ў першы працоўны дзень за касу пасадзілі.
Нехта цікавіўся, ці можа лічыць сябе кваліфікаваным касірам, калі сам заўсёды прабівае тавары на касе самаабслугоўвання.
Адзін з каментатараў паспачуваў дзяўчатам: «Вучыцца тры гады дзеля зарплаты 1000 рублёў, а ў сельскай краме — 500 рублёў. Без магчымасці кар’ернага росту і развіцця. Калі стаць зваршчыкам і прапрацаваць 20 гадоў, дык заробкі будуць у некалькі разоў большыя, а тут…». Была і парада каледжу пачаць вучыць не на касіраў, а на круп’е, бо ў казіно зарабляюць значна больш.
Шмат хто быў здзіўлены, што такой працы трэба недзе вучыцца і атрымліваць дыплом. Нехта з надзеяй удакладняў, ці не штучны інтэлект стварыў гэты ролік для тыктоку.
Самы папулярны каментарый такі: «А ёсць спецыяльнасць «Галя, адмена»?». Другі ж жартаўнік адказаў мужчыну: «Не, гэта ўжо магістратура».
Каментары
Ці увогуле, дзяўчаты, збягайце да нас, у Эўропу. Я, калі заходжу, напрыклад у Tesco, там амаль усе касіркі з Украіны, і я не думаю, што яны скончылі Смілавіцкі каледж.