Начальніца турмы ў Англіі закруціла раман з вязнем-наркабосам і цяпер сядзе сама

42-гадовую Кэры Пег называлі «зоркай» пенітэнцыярнай службы, якая за шэсць гадоў паднялася кар'ернымі прыступкамі ад учорашняй выпускніцы да начальніцы турмы HMP Kirkham у Ланкашыы.

Але на судзе стала вядома, што яна «не гуляла па правілах» і пачала стасункі з галоўным ліверпульскім злачынцам Энтані Сондэрсанам, дапамагаючы яму дамагчыся вызвалення.

Суд прысяжных Прэстанскага суда вынесе вердыкт пасля двухтыднёвага разгляду.

Падчас суда стала вядома, што паліцыя правяла ператрус у доме Пег і знайшла зубную шчотку з ДНК Сондэрсана.

Таксама высветлілася, што Сондэрсан падарыў Пег, якую таксама прызналі вінаватай у захоўванні злачыннай маёмасці, аўтамабіль Mercedes C-класа коштам 12 000 фунтаў стэрлінгаў, за які ён заплаціў 34 кілаграмамі амфетаміну.

Падчас зносін з іншымі злачынцамі Сондэрсан выкарыстоўваў імя Джэсі Пінкман — так звалі гандляра метамфетамінам у папулярным серыяле «Ва ўсе цяжкія».

Ён таксама быў вядомы пад імем Джэймс Гандальфіні — акцёра, які граў Тоні Сапрана ў серыяле пра мафію.

На судзе стала вядома, што Пег праводзіла шмат часу ў сваім кабінеце з вязнем, а ў кастрычніку 2018 года ён падаў прашэнне аб часовым вызваленні.

Хоць такія запыты з’яўляюцца звычайнай справай, існуюць пэўныя правілы адносна таго, як іх варта разглядаць, і гэтыя правілы начальніца турмы парушыла.

Было ўстаноўлена, што яна не мела паўнамоцтваў зацвярджаць вызваленне, але ўмяшалася і зацвердзіла заяву, не паведаміўшы службоўцу, які меў бы яе разглядаць.

Падчас абвяшчэння рашэння прысяжных Пег стаяла, схіліўшы галаву, і не рэагавала.

Суддзя Грэм Ноўлз сказаў ёй, што яна можа рыхтавацца да пазбаўлення волі: «У мяне няма іншага выбару, акрамя як адправіць вас у турму з-за цяжкасці вашага злачынства».

Падчас разгляду стала вядома, што Сондэрсан распрацаваў і запусціў праграму пад назвай BADD (Пераадоленне алкагольнай і наркатычнай залежнасці) для зняволеных у некалькіх турмах, хоць на той час быў наркадылерам і кіраваў фабрыкай па вытворчасці амфетаміну.

Пег сцвярджала, што яе кантакт з Сондэрсанам адбываўся з-за яго ўдзелу ў праграме BADD.

Але нават члены ягонай банды наракалі, што іх бос праводзіць занадта шмат часу з Пег, «далёка ад жонкі і працы».

Даючы паказанні на сваю абарону, заплаканая Пег сцвярджала, што яе зносіны з Сондэрсанам былі «дурнымі», але настойвала, што не зрабіла нічога дрэннага.

Яе адвакат адзначыў, што яна была «наіўнай». Бок абвінавачання прывёў доказы таго, што яна праводзіла ўсё больш часу з наркабосам па меры таго, як яго дзесяцігадовае зняволенне набліжалася да канца.

Дэтэктывы высветлілі, што Пег жыла шыкоўней, чым дазваляў яе заробак, купляючы дызайнерскія ювелірныя вырабы і вопратку, у тым ліку абутак Jimmy Choo і каралі Chanel.

Яны выявілі, што, нягледзячы на даход у 3000 фунтаў стэрлінгаў у месяц, яна была ў даўгах і не паведаміла пра тры рашэнні акруговага суда, што з’яўляецца неналежнымі паводзінамі, бо даўгі робяць чыноўнікаў уразлівымі да карупцыі.

Яе чатыры крэдытныя карты былі «поўнасцю вычарпаныя», а на яе ашчадным рахунку было 6 пенсаў, стала вядома ў судзе.

Барбара-Луіза Вэбстэр, якая прадстаўляла бок абвінавачання, сказала, што ў Пег была перспектыўная будучыня, але дадала, што «Энтані Сондэрсан стаў яе крахам».

«Паводзіны Кэры Пег далёкія ад таго, чаго можна было б чакаць ад любога супрацоўніка пенітэнцыярнай службы, не кажучы ўжо пра такую высокую пасаду, як начальнік турмы», — адзначыў Тэрын Мак-кефры з Каралеўскай пракуратуры.

«Яна мела неналежныя стасункі з Сондэрсанам пасля таго, як яго вызвалілі, і доказы сведчаць, што яны пачаліся яшчэ тады, калі ён быў у турме», — дадаў ён.

«Гэтыя стасункі, а таксама той факт, што Пегг не паведаміла пра даўгі сваім працадаўцам, — гэта грубае парушэнне, якое наносіць надзвычайную шкоду грамадскаму даверу», — адзначыў Мак-кефры.

Дакладную дату прысуду Пег яшчэ не абвясцілі.

• 1
• 0
• 5
• 0
• 1
• 0
• 1
• 0