9 тысяч кніг з рук у рукі: у ЗША сотні чалавек стварылі «жывы ланцуг», каб дапамагчы кнігарні з пераездам
У акцыі ўзялі ўдзел 300 чалавек.
Жыхары невялікага мястэчка Чэлсі ў ЗША ўтварылі «жывы ланцуг», каб дапамагчы мясцовай кнігарні перанесці на новую лакацыю больш за дзевяць тысяч кніг.
Удзельнікі сталі ў два шэрагі ўздоўж ходнікаў у цэнтры горада. «Ланцуг» пачынаўся каля старой лакацыі і заканчваўся каля новага месца, куды вырашыла пераехаць кнігарня.
Людзі па чарзе перадавалі кнігі адзін аднаму і ставілі іх на паліцы ў новым магазіне паводле алфавіту. Як гэта адбывалася — паказалі на старонцы кнігарні ў Instagram.
«Вельмі шмат людзей хацелі дапамагчы. Гэта быў зручны спосаб перамясціць кнігі. А яшчэ — магчымасць для кожнага ўзяць удзел», — адзначыла ўладальніца кнігарні Мішэль Таплін.
Паводле яе слоў, увесь працэс заняў крыху менш за дзве гадзіны. Жанчына кажа, што найманне транспартнай кампаніі для ўпакоўкі і распакоўкі тысяч кніг заняло б значна больш часу.
Новую кнігарню плануюць адкрыць на працягу наступных двух тыдняў.
Агулам у Чэлсі пражывае 5300 чалавек.
Цяпер чытаюць
З Лондана Мельнікава вылецела на Шры-Ланку, у яе быў каханак спартовага выгляду з Беларусі58
Каментары