На мінулым тыдні каля «Мінск-Арэны» выстраілася вялізная чарга. Беларусы палявалі на білеты на матчы «Дынама» супраць чалябінскага «Трактара», якія адбудуцца ў Мінску 16 і 18 красавіка.
Натоўп сабраўся яшчэ за некалькі гадзін да пачатку продажу — зразумела, білеты разабралі ў той жа дзень. А крыху пазней яны з’явіліся на адной з інтэрнэт-барахолак, піша Onliner.by.
Сітуацыю пракаментавалі ва ўпраўленні аператыўных мерапрыемстваў інспекцыі МПЗ па г. Мінску:
— На фоне паспяховага выступлення ХК «Дынама-Мінск» у гэтым сезоне ўпраўленне настойліва папярэджвае спекулянтаў, што дзейнічаюць па-за межамі прававога поля: не варта нажывацца на радасці беларускіх балельшчыкаў. Мы патэлефануем у любы момант і «пагадзімся» на вашы 200 рублёў за білет. Але ўлічыце: сустрэча ў вызначаным месцы нічога добрага вам не прынясе — страціце і нервы, і час, і білеты.
Давядзецца потым апраўдвацца, як вы з сябрамі збіраліся паглядзець хакей разам, але з розных сектараў арэны, а ў выніку не змаглі. І тлумачыць, чаму аб’явы аб продажы размясцілі загадзя… Відаць, дар прадбачання падказаў, што пайсці не атрымаецца? А тое, што білет коштам 35 рублёў прадаеце за 200 — гэта кампенсацыя маральнай шкоды за тое, што не змаглі пайсці?
Ну а калі сапраўды так здарылася, што ў сумленнага чалавека не атрымліваецца схадзіць на мерапрыемства? Прадайце білет па намінале, і тады вы дакладна дасцьце нам зразумець, што ў вашых дзеяннях няма накіраванасці на атрыманне даходу.
А вось што кажа пра перапродаж білетаў юрыст па абароне правоў спажыўцоў Іван Райкевіч:
— Калі гэта сітуацыя, калі чалавек купіў білеты, але яны яму не спатрэбіліся, наўрад ці ў яго будуць праблемы, калі ён іх перапрадаў.
Аднак варта ўлічваць нюанс: калі чалавек сістэматычна набывае білеты і перапрадае іх па цане большай, чым купіў, то ёсць займаецца дзейнасцю, скіраванай на атрыманне прыбытку, то фактычна ён ажыццяўляе прадпрымальніцкую дзейнасць. А незаконная прадпрымальніцкая дзейнасць цягне адказнасць паводле артыкула 13.3 Кодэкса Рэспублікі Беларусь аб адміністрацыйных правапарушэннях.
Каментары