Сталі вядомыя новыя прозвішчы затрыманых топ-менеджараў Мазырскага НПЗ
Днямі «Флагшток» паведаміў аб затрыманнях у адміністрацыі Мазырскага нафтаперапрацоўчага завода. Цяпер крыніца выдання дадала новыя прозвішчы. Як сцвярджаецца, быў арыштаваны першы намеснік генеральнага дырэктара прадпрыемства — галоўны інжынер Сяргей Грамовіч.
Затрыманні адбыліся ў канцы красавіка, і да гэтага часу Грамовіча няма на працы, піша выданне. Замест яго прызначаны выконваючы абавязкі, а сам галоўны інжынер, паводле афіцыйнай інфармацыі, знаходзіцца ў «часовым адпачынку», калі ён скончыцца — у адміністрацыі не могуць адказаць.
Таксама стала вядома, што акрамя дырэктара дырэкцыі па рэканструкцыі і развіццю Аляксандра Гуда быў затрыманы яго намеснік Антон Гугалінскі і жонка Гуда, якая працавала ў той жа дырэкцыі.
Яшчэ адзін затрыманы — начальнік юрыдычнай службы Ігар Драгель. Такім чынам, вядомы прозвішчы і пасады ўсіх пяці затрыманых топ-менеджараў.
Перад 1 мая генеральны дырэктар завода Віталь Паўлаў быў вельмі злы і зрываўся на падначаленых, адзначала крыніца «Флагштока». Пры гэтым работнікі прадпрыемства мяркуюць, што прычынай затрымання стала карупцыя, а не «палітыка».
Каментары