Ва Украіне загінуў камандзір Пскоўскай дывізіі, прызначаны Пуціным менш чым два месяцы таму
Школы Дагестана ў панядзелак пачалі паведамляць пра гібель камандзіра 76-й гвардзейскай дэсантна-штурмавой дывізіі ВДВ (вядомай таксама як Пскоўская) палкоўніка Абдулазіза Шыхабідава.
Уладзімір Пуцін прызначыў яго на гэтую пасаду толькі ў сярэдзіне сакавіка, піша «Агентство».
Паводле даных Z-паблікаў, Шыхабідаў ужо пахаваны на Траекураўскіх могілках у Маскве.
У ліцэі №13 Каспійска адкрылі памятны куток, прысвечаны Шыхабідаву. Тут размясцілі яго фатаграфіі і матэрыялы пра баявы шлях вайскоўца. А ў Буйнакскай сярэдняй школе-інтэрнаце №3 прайшлі пазакласныя мерапрыемствы для вучняў 7—9 класаў. Падлеткі ўпрыгожылі кабінет фатаграфіямі вайскоўца і георгіеўскай стужкай, правялі хвіліну маўчання і запалілі «свечкі памяці». Пасля публікацыі фотарэпартаж з акаўнта Буйнакскай школы быў выдалены, але захаваўся ў вэб-архіве.
Пра смерць Шыхабідава паведамілі і праўладныя z-паблікі. У суполцы «За Радзіму і ВДВ» напісалі, што развітанне з камандзірам адбылося на Траякураўскіх могілках у Маскве ў панядзелак.
76-я гвардзейская дэсантна-штурмавая дывізія ВДВ удзельнічае ў канфлікце з Украінай з 2014 года. Яе байцы бралі ўдзел у захопе Крыма, а таксама ў баявых дзеяннях у Данецкай вобласці, пра што стала вядома пасля масавых пахаванняў дэсантнікаў.
Пасля поўнамаштабнага ўварвання ва Украіну ў лютым 2022 года, менавіта Пскоўская дывізія стаяла ў Бучы. Расследаванне агенцтва Reuters пацвярджала сувязь вайскоўцаў злучэння з актамі гвалту супраць мірных жыхароў.
10 сакавіка Пуцін павысіў былога камандзіра дывізіі генерал-маёра Сяргея Чубарыкіна да пасады камандуючага ВДВ, а на яго месца прызначыў Шыхабідава. Праз месяц Пуцін пахваліў 76-ю дывізію, заявіўшы, што «практычна кожны дзень» чуе пра яе поспехі на фронце.
Пасля гэтага ў Дагестане, адкуль родам Шыхабідаў, пачалі размяшчаць білборды з яго выявай, а ў школах — змушалі дзяцей маляваць яго партрэты.
Да Украіны Шыхабідаў удзельнічаў у баявых дзеяннях у Паўднёвай Асеціі і Сірыі. Узнагароджаны трыма ордэнамі Мужнасці і Суворава, а таксама медалямі «За адвагу» і «За заслугі перад Айчынай» I і II ступені.
Каментары