З 1 мая падатковая атрымлівае звесткі пра плацяжы беларусаў у інтэрнэт-крамах за мяжой
З 1 мая падатковыя органы Беларусі могуць атрымліваць інфармацыю пра плацяжы беларускіх пакупнікоў у інтэрнэт-крамах за мяжой, піша Myfin.by. Гэта вынікае з паправак у Падатковы кодэкс, што ўступілі ў сілу.
Новаўвядзенні абавязваюць плацежныя сістэмы і банкі па запыце падаваць у Міністэрства па падатках і зборах (і яго інспекцыі) інфармацыю пра пералічэнні сродкаў на карысць замежных арганізацый, што прадаюць тавары праз інтэрнэт, а таксама аказваюць паслугі ў электроннай форме.
Правайдары і мабільныя аператары будуць абавязаны падаваць звесткі пра аказанне паслуг у электроннай форме і продаж тавараў замежнымі арганізацыямі.
Тое, як менавіта будуць прадстаўляцца даныя, зацверджана пастановай МПЗ ад 24.03.2025 №15, якая таксама ўжо ўступіла ў сілу. У справаздачы па запыце будуць указвацца назва замежных пастаўшчыкоў, колькасць, сума і валюта плацяжоў — як спісанне сродкаў у пакупнікоў у Беларусі, так і зварот ім грошай у выпадку вяртання.
У звестках, якія падаюць правайдары, будуць указвацца назвы і ідэнтыфікатары замежных інтэрнэт-рэсурсаў.
Цяпер чытаюць
Памятаеце кадэта, які на сустрэчы з Лукашэнкам смела выступіў па-беларуску? Ён выехаў з краіны21
Каментары