Больш за 20 тысяч расійскіх вайскоўцаў судзілі за адмову ваяваць супраць Украіны
За больш чым тры гады пасля ўварвання ва Украіну ў расійскія ваенныя суды паступіла больш за 20 тысяч спраў аб адмове ад службы. Пра гэта сведчаць даныя з сайтаў судоў, якія сабрала «Медыязона».
Найбольшая колькасць спраў (18 159) заведзена па артыкуле аб самавольным пакіданні часткі (арт. 337 КК), які з улікам «мабілізацыйных» паправак прадугледжвае да дзесяці гадоў пазбаўлення волі.
Па самым «лёгкім» артыкуле (да трох гадоў) аб невыкананні загаду (арт. 332 КК) у суды паступіла ўжо 1 369 спраў. Яшчэ тысяча (1 010) спраў аформлена па артыкуле аб дэзерцірстве (арт. 338 КК), за якое пагражае да 15 гадоў пазбаўлення волі.
Пасля рэкорднага мінулага года да вясны 2025 года ваенныя следчыя і пракуроры зноў выйшлі на пікавыя паказчыкі — каля тысячы спраў перадаюцца ў суды па ўсёй краіне кожны месяц. Суддзі пры гэтым спыніліся на адзнацы 700—800 прысудаў у месяц. У красавіку 2025 года вынесена 848 прысудаў, або 38 рашэнняў на кожны працоўны дзень — крыху больш, чым у мінулым годзе.
Усяго да канца мая 2025 года ў ваенныя суды паступілі справы аб адмове ад службы супраць 20 662 чалавек, з якіх 17 721 ужо атрымалі прысуды.
Паралельна з гэтым рост колькасці спраў за адмову ад службы назіраецца і ва Украіне. Паводле статыстычных даных Офіса генеральнага пракурора, з снежня 2024 года органы следства паведамляюць пра 15—20 тысяч новых спраў штомесяц.
Але з гэтых дзясяткаў тысяч спраў толькі ў сотнях выпадкаў абвінавачанне супраць канкрэтнай асобы перадаецца на разгляд у суд. А з тых спраў, што трапляюць у суд, дзве траціны — з хадайніцтвам пракурора аб вызваленні ад крымінальнай адказнасці.
Цяпер чытаюць
«Самі хутка здохнуць». Фоты з саміта ў Мінску даюць пабачыць Пуціна і Лукашэнку без грыму, а таксама Колю12
Каментары