Гурт Nazareth у апошні момант абвясціў, што не прыедзе на фестываль «Сонцастаянне» ў Пружанах. У чым прычына?
Шатландскі рок-гурт Nazareth адмяніў свой удзел у фестывалі «Сонцастаянне», які пройдзе ў беларускіх Пружанах 27-28 чэрвеня. Для публікі гэта стала нечаканым ударам: многія купілі квіткі яшчэ вясной і ехалі менавіта дзеля легендарных хітоў 1970-х, піша BGMedia.
Версіі адмены канцэрта
На афіцыйнай старонцы Nazareth у Facebook з'явілася кароткае, але ветлівае тлумачэнне:
«Абставіны, якія не залежаць ад нас, не дазволілі выступіць на фестывалі. Мы спадзяемся на сустрэчу ў 2026 годзе».
Здавалася б, звычайны форс-мажор. Але далей — цікавей. Па версіі арганізатараў фестывалю ўсяму віной — стан здароўя.
«На жаль, па стане здароўя некаторых удзельнікаў гурт не зможа прыехаць. Nazareth адмяніў шэраг выступаў у Еўропе, у тым ліку і наш. Не хвалюйцеся, канцэрт пераносіцца на 2026 год», — пішуць на афіцыйнай старонцы фестывалю ў Instagram.
Аднак ніводзін іншы еўрапейскі канцэрт не адменены. Больш за тое, 26 чэрвеня гурт паспяхова выступіў у Швейцарыі, затым запланаваныя шоу ў Нарвегіі, Эстоніі і Латвіі.
Па версіі білетнай платформы, канцэрт легендарнага рок-гурта быў адменены па «тэхнічных прычынах». Чаму яны адрозніваюцца ад версій арганізатараў і саміх музыкаў — ніхто не тлумачыць.
У публікі заканамернае пытанне: што адбываецца? Вось, што пішуць людзі ў каментарах пад навіной аб адмене выступу Nazareth.
«9 ліпеня ў Нарвегіі на канцэрт прадаюцца квіткі».
«Але яшчэ цікавей той факт, што на сайце ў іх ніводнай згадкі пра фестываль няма ані блізка. А 26-га ў іх прайшоў канцэрт у Жэневе без пераносаў і адмен».
Многія прызнаюцца, што ехалі на фестываль толькі дзеля гэтай групы.
«Малайцы, што паведамілі тады, калі білет ужо не вярнуць, так бы на гэты дзень я яго здала».
«Гэта вельмі сумна. Я спадзяваўся хоць раз пачуць ужывую іх знакамітыя хіты, хоць раз у жыцці!»
«Яшчэ паўгода таму я пісаў, што ўсё так і будзе. Арганізатары замахнуліся завабіць у наш калгас столькі культавых музыкаў — гэта было асуджана на правал».
Хтосьці ўвогуле заклікае здаваць квіткі, таму што «людзей ўводзяць у зман», а «фестываль ужо зарэкамендаваў сябе як «не вельмі».
«На афішы адно, потым выдаляюць без якіх-небудзь тлумачэнняў. Артысты нават не ў курсе, што арганізатары плануюць іх выступ».
«Квіткі па касмічнай цане не прадалі, банальна грошай не хапіла… На аплату ганарару».
Раней беларусы абурыліся рэкордна дарагімі квіткамі на маючы адбыцца рок-канцэрт. Многія не чакалі такіх расцэнак. Кошт квіткоў на два дні пачынаўся ад 230 рублёў, фан-зона — 420, VIP — 700. Летась цэны былі значна ніжэйшыя: ад 23 рублёў за канцэртны вечар, а максімальная цана дасягала 185 BYN.
Хто стаіць за фестывалем?
Фестываль «Сонцастаянне» — не проста музычны ўікэнд. Паводле звестак журналістаў-следчых «Бюро», да арганізацыі мерапрыемства датычны Аляксандр Зайцаў — бізнэсмен, якога называюць «кашальком» Аляксандра Лукашэнкі. Ён жа — фігурант санкцыйных спісаў ЕС.
Сярод хэдлайнераў рок-фестывалю «Сонцастаянне» — расійскія артысты, якія падтрымалі вайну ва Украіне: Юлія Чычэрына, якая нядаўна выступала ў Брэсце на Дзень памяці, Святлана Сурганава, гурты «Аліса», «Арыя», «Чайф».
Дарэчы, арганізатары паабяцалі кампенсаваць адсутнасць Nazareth «таемным госцем». Ім стаў Кі Марчэла — шведскі гітарыст і вакаліст, найбольш вядомы як былы гітарыст хард-рок-гуртоў Europe і Easy Action. Сёння ён працягвае сольную кар'еру.
Мяркуючы па каментарах, гледачы лічаць гэтую замену не раўназначнай.
«Замена нават блізка не раўнацэнная. І новы выканаўца запрошаны відавочна не за дзень учора».
«Вярніце грошы, калі ласка!»
«Сказаць, што суцяшэнне слабое — нічога не сказаць».
«Нагадвае мінулы год, як з «Кіно».
На леташнім фестывалі легендарную групу «Кіно» ў апошні момант замянілі Z-калектывам «Кіпелаў». Тады арганізатары напісалі, што «Кіно» не возьме ўдзел у рок-фестывалі ў сувязі «з форс-мажорнымі абставінамі».
Цяпер чытаюць
«Самі хутка здохнуць». Фоты з саміта ў Мінску даюць пабачыць Пуціна і Лукашэнку без грыму, а таксама Колю4
Каментары
PS. Спадарства, вось я ў юнацтве 82-86г.г. мінулага ст. слухаў цяжкі метал, прабачце, што не лацініцай, Акцэпт, Скорпіёнс, Дыстракшн і шмат іншых, тады хлопцам было няхай па 30 гадоў. Зараз ім далёка за 60-70, што вы хочаце пачуць і ўбачыць? Дык паслухайце той арыгінал ці паглядзіце тыя відэа, а не гэтае шоў пеньсіянераў пад фанаграму. Ну не будзе Уда Діркшнайдэр вам так сьпяваць, як гэта было 30-40 гадоў таму.