Шаснаццаць градусаў. Расійскі карэспандэнт паскардзіўся, што змерз у лукашэнкаўскім палацы
Карэспандэнт расійскага выдання «Коммерсантъ» Андрэй Калеснікаў, вядомы сваёй манерай пісаць рэпартажы з розных самітаў у здзеклівым стылі, прыехаў у Мінск на пасяджэнне Вышэйшай эканамічнай рады ЕАЭС і, як сцвярджае, у Палацы Незалежнасці зусім змерз.
«Але пара было ўжо і заканчваць. Бо ў Палацы Незалежнасці было да дрыжыкаў холадна ўвесь гэты час. Я не мог знайсці гэтаму ніякага лагічнага тлумачэння, пакуль не пагаварыў з памочнікам прэзідэнта Юрыем Ушаковым, які вярнуўся з абеду.
— Усё відавочна, — паціснуў ён плячыма. — Шаснаццаць градусаў — гэта тэмпература, пры якой п'юць чырвонае віно. І не толькі ў Беларусі. Вось і цяпер: прыносяць са склепа чырвонае віно і п'юць яго пры тэмпературы шаснаццаць градусаў! І не трэба ахалоджваць! Усе ўжо і так ахаладзіліся.
Прэс-сакратар прэзідэнта Расіі Дзмітрый Пяскоў, які стаяў побач, успомніў, як у гэтым жа самым палацы некалькі гадоў таму кіраўніца Савета Федэрацыі Валянціна Матвіенка ў такой жа сітуацыі пасядзела, ды і папрасіла, каб не пасівець, прынесці ёй футра з гардэроба, у якім і прасядзела ўсё пасяджэнне ў пашыраным, не пабаюся гэтага слова, складзе», — напісаў Калеснікаў.
У іншым рэпартажы, з учарашняга Еўразійскага форуму, Калеснікаў празрыста патроліў Лукашэнку, намякнуўшы на ягоны мажны знешні выгляд:
«Фотафініш застаўся, я лічу, за прэзідэнтам Беларусі. Гэта ж ён прапанаваў калегам зрабіць family-фота на фоне непраўдападобна вялікага (як і сам Аляксандр Лукашэнка, прынамсі ў вачах сучаснікаў), проста вялізнага кар'ернага «БелАЗа-75710» грузападымальнасцю 450 тон. На яго фоне не такім уражлівым пачаў здавацца нават сам Аляксандр Лукашэнка».
Папярэдні рэпартаж Калеснікава, звязаны з Лукашэнкам, скончыўся гучным скандалам. У сваім рэпартажы пра парад у Маскве 9 мая Калеснікаў згадаў, што Лукашэнка нібыта не стаяў, калі на Краснай плошчы праходзілі беларускія вайскоўцы, хоць відэа з падзеі засведчыла адваротнае.
Гэтым скарыстаўся лукашэнкаўскі прапагандыст Рыгор Азаронак, які падчас стрыму сваёй перадачы даў сабе волю, не стрымліваючыся ў выразах.
«Андрэй Калеснікаў, ты гнілы вяртлявы під*рас. І *уясос. Кончанае чмо і аблёваны ліберал. І ўся твая газетка гэтая «Буржуй» — туалетная папера…», — вяшчаў прапагандыст.
Пасля таго Андрэй Калеснікаў быў вымушаны апраўдвацца і прабачацца.
«Упэўнены, ён і з канём каля аркі пагаварыў». Расійскі журналіст апісаў прыезд Лукашэнкі на парад
«Гнілы вяртлявы під*рас. І *уясос». Азаронак назваў Калеснікава з пула Пуціна словамі, незвычайнымі нават для сваіх эфіраў
Аўтар расійскага «Коммерсанта» выбачыўся перад Лукашэнкам за тое, як апісаў ягоны прыезд на парад
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары