У шкляных бутэльках больш мікрапластыку, чым у пластыкавых — нечаканае адкрыццё вучоных
Згодна з новым даследаваннем французскіх вучоных, у шкляных бутэльках з газіроўкай, ліманадам, півам ці халоднай гарбатай у 5-50 разоў больш мікрапластыку, чым у напоях у пластыкавай або металічнай тары. У чым прычына?
Вучоныя выяўляюць мікрапластык паўсюль — ад паветра, якім мы дыхаем, да ежы, якую спажываем. Ён знойдзены на Эверэсце і на дне Марыянскай упадзіны, нават у чалавечым целе.
Як піша Sciemc Alert, навукоўцы французскага агенцтва бяспекі харчовых прадуктаў (ANSES) правялі даследаванне, накіраванае на вызначэнне колькасці мікрапластыку ў розных відах напояў, якія прадаюцца ў краіне, і ўплыў на гэты паказчык рознай тары.
Навукоўцы выявілі, што ў шкляных бутэльках з газіроўкай, ліманадам, півам ці халоднай гарбатай утрымліваецца ў сярэднім каля 100 часцінак мікрапластыку на літр. Гэта ў 5—50 разоў больш, чым у напоях у пластыкавай або металічнай тары.
Як прызналіся самі аўтары, яны чакалі адваротнага выніку. Аднак пры далейшым даследаванні яны знайшлі гэтаму тлумачэнне.
Было заўважана, што часцінкі мікрапластыку ў шкляных бутэльках па сваім колеры, форме і палімерным складзе супадалі з фарбай на знешнім баку накрывак, якімі яны былі закрыты. Менавіта з гэтай фарбы, згодна з высновамі аўтараў, мікрапластык і трапляў у напой.
На накрыўках былі выяўлены мікрадрапіны, якія, верагодна, утварыліся ў выніку трэння падчас захоўвання. Гэтыя драпіны прывялі да таго, што часцінкі пластыка з фарбы абсыпаліся. А патрапіць у сам напой яны маглі падчас адкрыцця бутэлькі.
У пітной вадзе — як негазаванай, так і газаванай — колькасць мікрапластыку аказалася значна меншай: усяго 1,6—4,5 часцінкі на літр. Віно, нават калі яно было ў шкляной бутэльцы з накрыўкай, таксама мела вельмі нізкі ўзровень забруджвання. І патлумачыць гэта навукоўцы пакуль не могуць.
Затое ў безалкагольных напоях было знойдзена ў сярэднім 30 часцінак на літр у газіроўцы, у ліманадах — 40, піве — каля 60.
Праз тое, што паколькі не існуе эталоннага ўзроўню для патэнцыйна таксічнай колькасці мікрапластыку, немагчыма сказаць, ці ўяўляюць атрыманыя лічбы рызыку для здароўя. У той жа час навукоўцы адзначаюць, што вытворцы напояў маглі б лёгка паменшыць колькасць мікрапластыку, які выдзяляецца накрыўкамі ад бутэлек.
Агенцтва ANSES пратэставала метад ачысткі, які заключаецца ў абдзіманні накрывак струменем паветра, а потым прамыўку вадой і спіртам. У выніку колькасць мікрапластыку ў напоях знізілася на 60%.
Цяпер чытаюць
На мітынгу ў Вільні затрымалі правакатара. А Ціханоўскі заявіў пра намер дабівацца сустрэчы з Зяленскім19
Каментары
"Фарба на знешнім баку накрывак ..." :)))