Беларускі школьны настаўнік расказаў, колькі зарабляе на ферме ў Нідэрландах
Ужо некалькі месяцаў Іван працуе на галандскіх фермах. За месяц ён можа зарабіць значна больш, чым па сваёй прафесіі ў Беларусі.
Чатыры гады мужчына працаваў на будоўлі ў Маскве, звольніўся і думаў знайсці працу ў Беларусі — не атрымалася. Тады Іван рушыў па заробак у Нідэрланды. Пра працу там ён распавядае ў сацсетках.
Каля двух месяцаў у яго заняў працэс афармлення візы і кароткай адпрацоўкі ў Польшчы. Ужо на другі дзень у Нідэрландах мужчына змог працаваць — на мясцовай ферме.
Звычайны заробак там — 14,06 еўра за гадзіну. Расклад ва ўсіх работнікаў розны, але адпрацаваць можна і 160 гадзін за месяц. Атрымліваецца каля 2250 еўра брута.
Сярэдні заробак настаўнікаў у Беларусі — 2507 рублёў брута (даныя Белстата за студзень-май 2025 года). Гэта каля 730 еўра.
Па досведзе Івана, самая складаная праца на ферме — гэта збор брокалі. А вось працаваць з кветкамі было прасцей.
Шмат залежыць яшчэ і ад таго, на якога фермера працуе чалавек, тлумачыць беларус. Аднойчы ён працаваў на кіраўніка, які шмат крытыкаваў, нават калі праца рабілася добра. Ці, напрыклад, тэхнічныя прастоі ў працы не залічваліся ў заробак.
Жыллё для работнікаў таксама бывае розным — беларусу даводзілася плаціць і па 90 еўра за тыдзень.
Цікавая дэталь, якая сустракаецца ў галандскіх доміках, — платны душ. За 5 хвілін гарачай вады вас могуць папрасіць заплаціць 50 цэнтаў.
Пасля працы ў Нідэрландах Іван хоча вярнуцца ў Беларусь, дзе яго чакае жонка.
Цяпер чытаюць
Над шэрым кардыналам Нацбанка згусціліся хмары? Затрымалі яго сябра, былога выканаўчага дырэктара Банка развіцця7
Каментары