TikTok разблакаваў акаўнты Святланы Ціханоўскай і Паўла Латушкі. Як гэтага дамагліся?
17 ліпеня TikTok разблакаваў акаўнты Святланы Ціханоўскай і Паўла Латушкі на тэрыторыі Беларусі. Пра тое, як атрымалася гэтага дамагчыся і як прайшлі перамовы беларускіх дэмакратычных сілаў і кіраўнікоў гэтай сацыяльнай сеткі, выданне «Люстэрка» распытала ў дыпламатычнага дарадцы Святланы Ціханоўскай Дзяніса Кучынскага.
Дамагчыся разблакавання ўдалося ў выніку асабістай тэлефоннай размовы з прадстаўнікамі кампаніі. Як расказаў дыпламат, да сітуацыі яны паставіліся з «разуменнем і канструктыўна».
«У выніку нашай камунікацыі афіцыйныя акаўнты Святланы Ціханоўскай і Паўла Латушкі былі разблакаваныя. Дамовіліся аб далейшым узаемадзеянні, уключаючы абмен неабходнай інфармацыяй і матэрыяламі, а таксама важнасць прасоўвання працэдуры верыфікацыі для аўтараў, каб пазбегнуць непажаданых сітуацый», — гаворыць Кучынскі.
На момант блакавання акаўнтаў 11 чэрвеня ў дэмакратычных сілаў не было прамой сувязі з кіраўніцтвам TikTok. Таму давялося выкарыстоўваць дыпламатычныя кантакты.
Так, адзін з дарадцаў прэм'ер-міністра еўрапейскай дзяржавы, з якімі Кучынскі меў зносіны напярэдадні блакавання, якраз быў знаёмы з прадстаўнікамі TikTok ў сваёй краіне. З яго дапамогай удалося ўсталяваць кантакт з кіраўніцтвам сацсеткі.
«У мяне раней была размова з адным з людзей на кіруючых пасадах. Тады і атрымалася данесці нашу пазіцыю — што сапраўды TikTok з’яўляецца адной з найважнейшых платформаў у Беларусі, асабліва сярод моладзі. І папрасілі разблакаваць акаўнты Святланы Ціханоўскай і Паўла Латушкі», — расказаў суразмоўца.
Падчас першай размовы Офіс Святланы Ціханоўскай і прадстаўнікі сацсеткі абмеркавалі тое, якія крокі можна рабіць на апярэджанне, каб падобных блакаванняў больш не адбывалася. Акрамя таго, па словах Кучынскага, зайшла гаворка пра захаванне кантактаў і супрацоўніцтва ў будучыні. Таксама пагаварылі пра падтрымку беларускай мовы алгарытмамі сацсеткі і пра распрацоўку беларускага інтэрфейсу.
Сацсетка TikTok заблакавала акаўнты лідаркі беларускіх дэмсілаў Святланы Ціханоўскай і яе намесніка Паўла Латушкі для карыстальнікаў з Беларусі 11 чэрвеня 2025 года. Гэта быў першы выпадак, калі платформа абмежавала для карыстальнікаў з нашай краіны доступ да якіх-небудзь відэа.
Каментары