Фэйкавая журналістка «Новая газета Еўропа» спрабавала ўзяць інтэрв’ю ў Паўла Латушкі
19 чэрвеня прэс‑служба Народнага антыкрызіснага ўпраўлення атрымала запыт на інтэрв’ю ў Паўла Латушкі ад чалавека, які прадставіўся журналісткай выдання «Новая газета Еўропа» Ірынай Гарынай.
У запыце прапаноўваўся ўдзел у здымках поўнаметражнага дакументальнага фільма пра супраціў Еўропы агрэсіі з боку Расіі і Беларусі, паведамляе прэс-служба палітыка.
Пасля прапановы прэс‑службы НАУ перайсці ў месенджар для верыфікацыі і далейшай камунікацыі, чалавек, які пісаў з адрасу [email protected], спыніў камунікацыю.
Як удалося высветліць, журналістка з такім імем сапраўды працуе ў «Новая газета Еўропа», аднак яна ніякіх запытаў на інтэрв’ю з Паўлам Латушкам і здымкі фільма не накіроўвала.
Больш за тое, у Facebook выяўлены фэйкавы акаўнт журналісткі Ірыны Гарынай, створаны яшчэ ў 2022 годзе. Першая публікацыя на гэтай старонцы датавана снежнем 2022 года, што можа сведчыць пра мэтанакіраваную і загадзя спланаваную аперацыю — верагодна, з боку спецслужбаў.
Адметна, што напярэдадні ў Офіс Святланы Ціханоўскай таксама прыходзілі невядомыя, што прадставіліся журналістамі таго ж выдання і адсылалі аналагічны запыт з таго ж адрасу электроннай пошты, што і ў адрас НАУ. Як высветліла «Люстэрка», яны былі наняты праз Telegram ананімнымі заказчыкамі нібыта для інтэрв’ю са Святланай Ціханоўскай.
Дзеянні фэйкавых журналістаў, такіх як нібыта Ірына Гарына, — гэта не паасобныя правакацыі, а частка адладжанай сістэмы гібрыдных аперацый спецслужбаў, зазначаецца ў тэлеграм-канале палітыка.
Каментары