Біцэпсы Івана Краўцова здзівілі сацсеткі. Ён расказаў, як трымае сябе ў спартыўнай форме
Сакратар Каардынацыйнай рады Іван Краўцоў значную частку жыцця прысвячае спорту — зараз ён займаецца ў мацоўні па пяць разоў на тыдзень. Краўцоў расказаў «Нашай Ніве», як атрымліваецца прытрымлівацца такой рэгулярнасці і чым дапамагае гэта хобі ў жыцці.
Іван кажа, што зараз у яго тры асноўныя хобі — філасофія, спорт і музыка. Каля 50% свайго часу ён стараецца прысвячаць ім і заўважае, што агулам «не займаецца тым, што яму не падабаецца».
Свой шлях у філасофіі палітычны актывіст пачынаў са школы Уладзіміра Мацкевіча, які цяпер знаходзіцца ў зняволенні. Пасля Іван пачаў чытаць больш кніг, цікавіцца палітычнай філасофіяй — і нават скончыў магістратуру па гэтым кірунку ў Вялікабрытаніі. Цяпер ён рыхтуецца падаваць дакументы ў аспірантуру, каб пісаць дысертацыю.
Дома Іван часам грае на інструментах — клавішах і гітары. Калісьці вучыўся на падрыхтоўчым аддзяленні ў Акадэміі музыкі, а ў студэнцкія часы, згадвае Краўцоў, граў у розных гуртах.
У трэнажорнай залі ён займаецца кожны працоўны дзень. Дадаткова да таго — тры разы на тыдзень бегае, рыхтуецца да паўмарафону, які запланаваны на восень.
Такая сістэма ў яго выпрацавалася не адразу: хадзіць у мацоўню Іван пачаў яшчэ студэнтам, але тады гэта было па два-тры разы на тыдзень. Трэніроўкі займалі больш часу, цела больш стамлялася. Нейкі час актывіст займаўся сквошам, спрабаваў іншыя віды спорту.
Год таму Іван зноў вярнуўся ў залу — цяпер адзін яго занятак доўжыцца каля 50 хвілін. Кажа, што для яго гэта аказаўся самы эфектыўны спосаб.
«У мяне трэнажорная зала знаходзіцца ў суседнім доме. Вельмі зручна — нават не трэба пераапранацца. Адразу ў спартыўнай форме выскачыў — і можна займацца», — тлумачыць ён.
Займаецца актывіст часцей за ўсе ў абедзенны час, а падчас трэніроўкі слухае музыку ў навушніках. Калі бегае, то пад настрой можа паслухаць лекцыю на Coursera.
Іван дадае, што пачаткоўцам важна імкнуцца менавіта да рэгулярнасці — на трэніроўкі варта выдаткоўваць час штодня.
Да таго ж трэба добра есці, сачыць за нормай бялку ў арганізме. Сам Іван дабірае яго праз сываратачны пратэін, малочныя кактэйлі. Але кажа, што тыя, хто любіць гатаваць, цалкам могуць закрыць гэту норму і праз звычайную ежу.
«Шмат хто робіць памылку. Калі пачынаюць займацца спортам, баяцца набраць вагу і стараюцца менш есці. Але акурат на пачатковым этапе арганізм перабудоўваецца, апетыт расце. Вялікая памылка гэтаму супраціўляцца — у вас не будзе рэсурсаў, за якія арганізм адаптуецца», — кажа Краўцоў.
Таксама важны сон. Калі вы хацелі б пахудзець, з недахопам сну гэта даецца цяжэй: хочацца больш есці, бо арганізм хоча атрымаць энергію, якой не хапіла.
Адзіная дабаўка, якой карыстаецца Іван, — крэацін. Дадаткова час ад часу п’е звычайныя вітамінныя комплексы.
Праз трэніроўкі Іван адчувае сябе лепш, гэта ўплывае на мысленне і настрой. Але не толькі гэта стала прычынай для такой дысцыпліны:
«Гэта спосаб атрымаць хуткі і гарантаваны вынік. У бізнэсе ці ў палітыцы шмат што залежыць ад знешніх фактараў. А ў спорце, калі ты робіш усё па навуцы і дысцыплінавана, то з большай верагоднасцю атрымаеш чаканы вынік.
Калі будзеш некалькі месяцаў прыходзіць у залу рэгулярна, то абавязкова пабачыш вынік — што не гарантавана ў любой іншай сферы жыцця».
Стала вядома, дзе працуе фаварытка Лукашэнкі Уладлена Зайцава19
Каментары
Поел бы