Bicepsy Ivana Kraŭcova ździvili sacsietki. Jon raskazaŭ, jak trymaje siabie ŭ spartyŭnaj formie
Sakratar Kaardynacyjnaj rady Ivan Kraŭcoŭ značnuju častku žyćcia pryśviačaje sportu — zaraz jon zajmajecca ŭ macoŭni pa piać razoŭ na tydzień. Kraŭcoŭ raskazaŭ «Našaj Nivie», jak atrymlivajecca prytrymlivacca takoj rehularnaści i čym dapamahaje heta chobi ŭ žyćci.
Ivan kaža, što zaraz u jaho try asnoŭnyja chobi — fiłasofija, sport i muzyka. Kala 50% svajho času jon starajecca pryśviačać im i zaŭvažaje, što ahułam «nie zajmajecca tym, što jamu nie padabajecca».
Svoj šlach u fiłasofii palityčny aktyvist pačynaŭ sa škoły Uładzimira Mackieviča, jaki ciapier znachodzicca ŭ źniavoleńni. Paśla Ivan pačaŭ čytać bolš knih, cikavicca palityčnaj fiłasofijaj — i navat skončyŭ mahistraturu pa hetym kirunku ŭ Vialikabrytanii. Ciapier jon rychtujecca padavać dakumienty ŭ aśpiranturu, kab pisać dysiertacyju.
Doma Ivan časam hraje na instrumientach — kłavišach i hitary. Kaliści vučyŭsia na padrychtoŭčym adździaleńni ŭ Akademii muzyki, a ŭ studenckija časy, zhadvaje Kraŭcoŭ, hraŭ u roznych hurtach.
U trenažornaj zali jon zajmajecca kožny pracoŭny dzień. Dadatkova da taho — try razy na tydzień biehaje, rychtujecca da paŭmarafonu, jaki zapłanavany na vosień.
Takaja sistema ŭ jaho vypracavałasia nie adrazu: chadzić u macoŭniu Ivan pačaŭ jašče studentam, ale tady heta było pa dva-try razy na tydzień. Treniroŭki zajmali bolš času, cieła bolš stamlałasia. Niejki čas aktyvist zajmaŭsia skvošam, sprabavaŭ inšyja vidy sportu.
Hod tamu Ivan znoŭ viarnuŭsia ŭ zału — ciapier adzin jaho zaniatak doŭžycca kala 50 chvilin. Kaža, što dla jaho heta akazaŭsia samy efiektyŭny sposab.
«U mianie trenažornaja zała znachodzicca ŭ susiednim domie. Vielmi zručna — navat nie treba pieraapranacca. Adrazu ŭ spartyŭnaj formie vyskačyŭ — i možna zajmacca», — tłumačyć jon.
Zajmajecca aktyvist čaściej za ŭsie ŭ abiedzienny čas, a padčas treniroŭki słuchaje muzyku ŭ navušnikach. Kali biehaje, to pad nastroj moža pasłuchać lekcyju na Coursera.
Ivan dadaje, što pačatkoŭcam važna imknucca mienavita da rehularnaści — na treniroŭki varta vydatkoŭvać čas štodnia.
Da taho ž treba dobra jeści, sačyć za normaj białku ŭ arhaniźmie. Sam Ivan dabiraje jaho praz syvaratačny pratein, małočnyja kaktejli. Ale kaža, što tyja, chto lubić hatavać, całkam mohuć zakryć hetu normu i praz zvyčajnuju ježu.
«Šmat chto robić pamyłku. Kali pačynajuć zajmacca sportam, bajacca nabrać vahu i starajucca mienš jeści. Ale akurat na pačatkovym etapie arhanizm pierabudoŭvajecca, apietyt raście. Vialikaja pamyłka hetamu supraciŭlacca — u vas nie budzie resursaŭ, za jakija arhanizm adaptujecca», — kaža Kraŭcoŭ.
Taksama važny son. Kali vy chacieli b pachudzieć, ź niedachopam snu heta dajecca ciažej: chočacca bolš jeści, bo arhanizm choča atrymać enierhiju, jakoj nie chapiła.
Adzinaja dabaŭka, jakoj karystajecca Ivan, — kreacin. Dadatkova čas ad času pje zvyčajnyja vitaminnyja kompleksy.
Praz treniroŭki Ivan adčuvaje siabie lepš, heta ŭpłyvaje na myśleńnie i nastroj. Ale nie tolki heta stała pryčynaj dla takoj dyscypliny:
«Heta sposab atrymać chutki i harantavany vynik. U biznesie ci ŭ palitycy šmat što zaležyć ad źniešnich faktaraŭ. A ŭ sporcie, kali ty robiš usio pa navucy i dyscyplinavana, to z bolšaj vierahodnaściu atrymaješ čakany vynik.
Kali budzieš niekalki miesiacaŭ prychodzić u zału rehularna, to abaviazkova pabačyš vynik — što nie harantavana ŭ luboj inšaj śfiery žyćcia».
Ciapier čytajuć
Statkievič: Lidary ruchu za demakratyju pavinny zastavacca ŭ krainie, navat kali košt hetaha vialiki. Dyjaspara moža adyhrać tolki dapamožnuju rolu5656
Kamientary
Pojeł by