«Наколькі наша бурбалка з пагардай ставіцца да звычайных беларусаў». У фэйсбуку спрачаюцца пра Макса Каржа

У польскіх медыя пісалі, што жыхары Варшавы былі абураны несанкцыянаваным сходам прыхільнікаў беларускага рэпера, якія пакінулі пасля сябе шмат смецця і вельмі гучна сябе паводзілі.

Журналіст Аляксандр Арсёнаў з гэтай нагоды напісаў у фэйсбуку зварот да палякаў.

«Дарагія палякі! Як беларус, я са шкадаваннем прызнаю, што Макс Корж — мой суайчыннік, і сярод яго прыхільнікаў шмат маіх суайчыннікаў.

Мне сорамна за тое, як паводзяць сябе яго фанаты, і я збянтэжаны яго няёмкімі выказваннямі. Я прашу вас зразумець, што прыхільнікі Каржа не прадстаўляюць увесь беларускі народ, гэтак жа як прыхільнікі дыска-пола не прадстаўляюць увесь польскі народ.

Яго погляды на сэнс жыцця і стаўленне да жанчын мне чужыя, а часам і проста адштурхваюць. Аднак з яго творчасці можна зрабіць выснову, што ён не падтрымлівае ні Лукашэнку («Цяпло»), ні Пуціна («Свой дом»). Яму цяжка фармуляваць свае думкі, і як толькі ён выказваецца, ён робіць гэта вельмі асцярожна — магчыма, праз страх рэпрэсій супраць сваіх блізкіх у Беларусі.

Макс Корж — дзіця свайго часу. Час, калі ў Беларусі амаль усё беларускае забаронена, а Лукашэнка навязвае беларусам «рускі свет». Макс Корж — яшчэ не горшае, што маглі прынесці такія часы. Гэта нігілізм і жананянавісць, але, прынамсі, не пуцінізм. На шчасце, гэта не адзіны беларускі артыст, які выступае ў Польшчы».

Антось Жукаў з BYSOL не згодны з такой пазіцыяй і адказвае ўсім, хто ў фэйсбуку незадаволены выказваннямі Каржа.

«Вы не любіце Каржа ці ўсё-такі не любіце беларусаў?

У Варшаве прайшоў канцэрт галоўнай беларускай зоркі — Макса Каржа. На яго сабралася каля 80 000 чалавек. Пасля гэтага пачаўся сапраўдны кашмар… у каментарыях дэмакратычнай тусовачкі ў Facebook.

Хтосьці выпісваў Каржа з беларусаў, хтосьці выбачаўся перад палякамі за фанатаў артыста і яго творчасць, хтосьці засмучаўся, чаму гэта Максім не стаў займаць іх пазіцыю па вайне ва Украіне і рэпрэсіях у Беларусі.

Можна глядзець на гэта як на непрыманне самога артыста, але я вам прапаную паглядзець глыбей. Макс Корж — самы папулярны артыст у гісторыі нашай краіны, і гэта як мінімум матэматычны факт. Ні адзін артыст у гісторыі Беларусі не збіраў у Мінску поўны стадыён «Дынама». Ці можа гэта быць выпадковасцю? Ці можа быць выпадковасцю тое, што вакол артыста вырасла цэлая субкультура, чымсьці падобная да футбольных фанатаў?

Мой адказ — не, гэта не выпадковасць. Корж транслюе тыя каштоўнасці, якія вельмі блізкія «сярэднестатыстычнаму» беларусу.

Мяркуйце самі: артысту не падабаецца вайна, ён заклікае яе спыніць, але не спяшаецца абвінавачваць Расію. (…)

Корж выходзіць разам з мільёнамі беларусаў на акцыі пратэсту на самым піку, але пазней хаваецца ў бульбу і аддае перавагу казаць пра сваю пазіцыю толькі ўскосна.

Ці не падаецца вам, што пад усімі гэтымі заявамі і дзеяннямі падпісалася б большасць беларусаў у Беларусі — у адрозненне ад дэмакратычнай бурбалкі ў Facebook? Ці не падаецца вам, што беларусы бачаць у гэтым артысце, яго творчасці, яго вобразе адлюстраванне свайго светапогляду, і менавіта таму ён такі папулярны?

Што яшчэ добра падсвечвае гэтая сітуацыя — дык гэта тое, наколькі наша бурбалка закамплексаваная, адарваная ад рэальнасці і з якой пагардай яна ставіцца да звычайных беларусаў, якія ніяк не хочуць упісвацца ў іх уяўленні пра «правільную» беларускасць».

«Што ў выніку? — працягвае Антось. — Корж — гэта ідэальны прыклад «сярэднестатыстычнага» беларуса. Яго погляды на свет і нашу краіну рэзануюць з большасцю нашых суайчыннікаў. Макс — гэта твар сапраўднай Беларусі, якая можа вам падабацца ці не, але яна вось такая.

І калі вы хейціце Коржа, вы, па сутнасці, паказваеце, наколькі вам не падабаецца гэты «народзец».

• 28
• 3
• 3
• 30
• 2
• 0
• 2
• 0