Колькі каштуе даехаць да Вільні ці Варшавы на прыватным трансферы?
Пасля адмены часткі аўтобусных рэйсаў з Мінска ў Вільню попыт на трансфер па гэтым кірунку асабліва вырас. А вось прыярытэтчыкі амаль пакінулі чат.
Мінск-Варшава
Цана на прыватны трансфер з Мінска, Брэста ці Гродна да Варшавы і іншых польскіх гарадоў будзе залежыць ад адлегласці да патрэбнага месца.
Можна заказаць дадатковыя паслугі — напрыклад, вас сустрэнуць з адмысловай таблічкай у аэрапорце. Таксама трансфер можа давезці пасажыра не толькі да вакзала ці аэрапорта, а наўпрост да дома ці гатэля.
Машына на чатырох чалавек з Мінска да Варшавы будзе каштаваць 380-480 еўра. Калі выбіраць аўто бізнэс-класа, будзе даражэй.
Некаторыя перавозчыкі абяцаюць пастаянным кліентам праходжанне беларуска-польскай мяжы без затрымак — па-за чаргой.
Раней хутка прайсці мяжу часцей за ўсё атрымлівалася, калі ў салоне быў чалавек з інваліднасцю ці маленькае дзіця. Але ў апошні час схема са спецыяльна запрошанымі льготнікамі можа не спрацаваць — пасля скаргаў падатковая і пагранічнікі сталі правяраць іх. Пагражае штраф і вяртанне ў Беларусь.
У чатах па праходжанні мяжы колькасць аб’яў пра такі праезд за апошні тыдзень значна скарацілася — карыстальнікі заўважаюць:
«Куды ж падзяваліся прыярытэтчыкі? Няўжо ім нарэшце панасоўвалі? Раней праз пост быў прыярытэт, а цяпер — наогул нікога».
Практыка з выкарыстаннем ільготнага статусу для хуткага праходжання мяжы ў пункце «Брэст» ужо скарацілася ў тры разы.
«Наша Ніва» пад выглядам пасажыраў усё ж звязалася з некаторымі кіроўцамі, якія ў тэлеграм-чатах прапануюць праехаць мяжу без затрымак. Як і паведамлялася раней, кошт такой паездкі для адной машыны — 350-400 еўра. Калі ехаць з іншымі незнаёмымі пасажырамі, у кожнага папросяць па 90 еўра.
Механізм у «бізнэсменаў» таксама розны: аднаго пасажыра прыярытэтнага аўто могуць абавязаць знайсці чалавеку з інваліднасцю адваротную машыну ў Беларусь пасля праходжання мяжы, а ў іншым выпадку гэту задачу вырашыць сам кіроўца.
Мадэратары аднаго з чатаў пішуць, што цяпер любых пасажыраў забаронена высаджваць з аўто. Спроба такой высадкі канчаецца штрафам да 40 базавых велічынь і разваротам машыны ў беларускі бок. Таксама ў аўто з прыярытэтам цяпер правяраюць дакументы для заезду ў Польшчу.
Мінск-Вільня
Попыт на трансферы да Вільні ці літоўскіх аэрапортаў павысіўся, калі перавозчыкі адмянілі некаторыя з аўтобусных рэйсаў. У тэлеграме людзі пішуць, што трансфер з Мінска ці з мяжы да Вільні ім асабліва спатрэбіўся, калі скасавалі менавіта іх аўтобус.
«Мы вельмі стрэсавалі, калі за два дні да адпраўлення адмяніўся наш аўтобус, а зводкі навін былі несуцяшальныя».
Цана на трансфер з Мінска да Вільні ніжэйшая, чым да Варшавы, — ад 150 да 300 еўра за машыну.
На гэтым кірунку таксама працуе схема з прыярытэтным праходжаннем мяжы — хаця, як і ў выпадку з Польшчай, прапаноў у тэлеграм-чатах цяпер публікуецца значна менш. Адзін з кіроўцаў назваў цану за прыярытэтны трансфер з пункту «Каменны Лог» да Вільні — 70 еўра.
Каментары