На амерыканскім фестывалі Burning Man упершыню зладзілі беларускі лагер
Беларусы не першы раз удзельнічаюць у Burning Man, але ўласны лагер у пустыні Блэк Рок паўстаў у першы раз, піша Reform.news.
«MARA, — апісваецца лагер на афіцыйным сайце фестывалю, — запрашае вас пазнаёміцца са старажытнымі беларускімі магічнымі практыкамі і традыцыямі, якія спрыяюць рытуальнаму ачышчэнню і натхняюць на новыя пачынанні».
У якасці магічных практык беларусы прапануюць папарыцца ў традыцыйнай лазні, пакаштаваць травяной гарбаты і пачаставацца дранікамі. Для гэтага падрыхтавалі намёты з прынтамі ў стылі выцінанкі і адмысловы аўтобус — Dranik-bus.
Лазню прывезлі з Варшавы — гэта вялікі намёт, унутры якога размяшчаецца печ, а венікі для лазні — з Украіны.
Mara Camp з‘явіўся дзякуючы агенцтву Vondel Digital, заснаванаму былым палітвязнем Аляксандрам Васілевічам.
Фестываль Burning Мan у ЗША праходзіць штогод. Насамрэч арганізатары называюць імпрэзу не фестывалем, а эксперыментам, у выніку якога ў пустыні з’яўляецца своеасаблівы горад, у якім амаль усё, што адбываецца, цалкам ствараецца яго жыхарамі. У пустыні ўстанаўліваюцца творы сучаснага мастацтва, часта фантастычных формаў. Некаторыя з іх спальваюцца стваральнікамі да заканчэння фэсту.
Кульмінацыяй фестывалю з‘яўляецца спальванне вялізнай скульптуры чалавека ў цэнтры лагера.
Цяпер чытаюць
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі19
Работнікам Цэнтра алімпійскай падрыхтоўкі па фрыстайле забаранілі ісці на пахаванне Мікалая Казекі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары