23 верасня Сейм Літвы зацвердзіў папраўкі ў Закон аб авіяцыі і Статут прымянення вайсковай сілы, якія дазваляюць арміі хутчэй і прасцей нейтралізаваць дроны, якія парушаюць паветраную прастору краіны. Закон быў прыняты ў тэрміновым парадку, бо неабходна неадкладна абараніць жыццёва важныя інтарэсы дзяржавы і грамадства, паведамляе LRT.
Міністарка абароны Літвы Давіле Шакалене адзначыла, што ранейшыя правілы не адпавядалі сучасным пагрозам, а новыя папраўкі дазваляюць выкарыстоўваць вайсковую сілу супраць беспілотнікаў у забароненых або абмежаваных зонах, калі яны парушаюць усталяваны парадак.
Раней армія магла прымяняць сілу толькі супраць дронаў, што выкарыстоўваліся як зброя, а цяпер магчымасці значна пашыраныя, што дазволіць хутчэй рэагаваць на парушэнні паветранай прасторы. Пры гэтым вайсковая сіла будзе выкарыстоўвацца толькі пры абсалютнай неабходнасці з максімальнымі мерамі бяспекі для людзей і маёмасці.
Пілоты цывільнай авіяцыі не змогуць лётаць у абмежаваных зонах без спецыяльнага дазволу, а пастаўшчык аэранавігацыйных паслуг абавязаны паведамляць усім паветраным судам пра актывацыю абмежаваных зон не пазней чым за 10 хвілін да гэтага. Пілоты павінны выкарыстоўваць радыёсувязь і транспондар у некантраляванай паветранай прасторы.
Папраўкі падрыхтаваныя з улікам інцыдэнтаў гэтага лета, калі ў паветраную прастору Літвы заляцелі два расійскія дроны Gerbera, адзін з якіх нёс выбухоўку. У апошнія месяцы расійскія беспілотнікі неаднаразова парушалі паветраную прастору краін НАТА — Польшчы, Эстоніі і Румыніі.
Цяпер чытаюць
Фоты з Масквы даюць пабачыць Пуціна і Лукашэнку без грыму11
Каментары