Другі раз за апошнія суткі абедзве ўзлётна-пасадачныя палосы ў аэрапорце Мюнхена закрыты, паколькі паблізу былі заўважаныя дроны невядомага паходжання.
«Нямецкія авіядыспетчары абмежавалі палёты ў аэрапорце Мюнхена ў якасці меры засцярогі з-за непацверджанага выяўлення дронаў», — гаворыцца ў заяве аэрапорта. Палёты прыпыненыя «да далейшых паведамленняў».
Увечары ў чацвер аэрапорт Мюнхена таксама закрываўся на некалькі гадзін, паколькі ўлады западазрылі, што побач з ім з’явіліся дроны.
«Калі нам сёння не дазволяць лятаць, то дакладна затрымаюцца больш пасажыраў, чым тыя тры тысячы, што былі ў ноч на 3 кастрычніка», — цытуе Reuters афіцыйнага прадстаўніка аэрапорта.
На мінулым тыдні з-за невядомых дронаў давялося на некаторы час закрыць аэрапорты Капенгагена і Осла, на гэтым тыдні, у аўторак, дрон зноў быў заўважаны побач з нарвежскім аэрапортам, але не ў Осла, а ў горадзе Бройнесун, нагадвае Бі-бі-сі.
Дарэчы, учора падчас выступу ў Сочы Уладзімір Пуцін пажартаваў пра дроны ў Еўропе.
Калі ў кіраўніка Крамля спыталі, ці запускаў ён дроны ў Данію, Пуцін засмяяўся і, зрабіўшы рукою пагардлівы жэст, адказаў: «Я больш не буду. Ні ў Францыю, ні ў Данію. Куды яшчэ далятаюць? У Лісабон».
Акрамя таго, ён нават параўнаў трывогу еўрапейцаў наконт дронаў з панікай перад НЛА: «Ведаеце, там забаўляюцца людзі, якія калісьці забаўляліся наконт НЛА. Там столькі дзівакоў, як і ў нас, дарэчы кажучы. Нічым не адрозніваюцца, асабліва маладыя людзі».
Каментары
Дозакрываются до коллапса экономики Германии и ЕС.