Вытанчанае французскае бістро Le Château 27, якое фактычна належыць старшыні НАК Віктару Лукашэнку, адкрылася ў Мінску сёлета ў маі.
Шэф-кухар у Le Château 27 той самы, што і ў «Лебядзіным», — Мікіта Чыхачоў. Сёлета ён выйграў залаты медаль на міжнародным конкурсе Chef of the world, які праходзіў у Кітаі.
У асноўным меню рэстарана цэны такія: слімакоў можна паесці за 21 рубель, адна вустрыца з дадаткам — 19‑21 рубель, салаты — за 31‑35 рублёў, супы — за 19‑29 рублёў. Самая дарагая з галоўных страў — гэта стэйк расіні з фуа-гра і булачкай брыёш, які каштуе 59 рублёў. Самая танная — гэта каўбаса з качкі і фуа-гра з пюрэ і соусам жу за 37 рублёў.
Дэсерты ў Le Château 27 каштуюць ад 12 да 21 рубля.
Колькі каштуюць бранчы? Мінская блогерка, якая зазірнула ў рэстаран на бранч з сяброўкай, заказала на дваіх няшмат — па «рыбным сняданку» і адзін чайнік фруктовай гарбаты на дваіх. У той сняданак за 29 рублёў уваходзіць рыет (гэта накшталт паштэту) і тартар са стронгі, крэм-авакада, яйка, шпінат, булачка брыёш.
Агульны рахунак у выніку склаў 73 рублі.
Калі браць на сняданак яечню — канешне, яна тут будзе не проста з перцам, а яшчэ і з хамонам з качкі — гэта абыдзецца ў 23 рублі. А, напрыклад, французскі тост з тартарам з ялавічыны ды мусам бры ўсе 33.
За круасан з апельсінавым джэмам просяць 10 рублёў, а за варэнікі з вішнямі і рыкотай — 19.
Цяпер рэстаран удзельнічае ў праекце высокай кухні і прапануе наведвальнікам вытанчаны сэт па цане 99 рублёў (разлічаныя порцыі на аднаго чалавека). Дапоўніць яго прапаноўваюць шампанскім (35 рублёў за 125 мілілітраў) ці каньяком (21 рубель за 40 мілілітраў).
Рэкламаваць Le Château ужо прылятаў Апці Азіеў — беларускі дызайнер, які стаў сусветна вядомым дзякуючы сваім вірусным відэа ў сацыяльных сетках. Ён нахвальваў бургер з тунцом за 55 рублёў.
У роліку Апці ў сваёй традыцыйнай манеры спачатку неахайна п’е напой, разліваючы яго, затым так жа неахайна піхае бургер сабе ў рот, а потым і афіцыянтцы. Выглядае даволі абразліва, але рэклама ў інстаграме Апці прынесла рэстарану каля 380 тысяч праглядаў.
Першая вясна на волі. Ніна і Уладзімір Лабковічы расказалі пра сваю гісторыю кахання і жыццё пасля турмы5
Каментары