Улады Латвіі разглядаюць магчымасць дэмантажу чыгуначных пуцей, якія вядуць у Расію, паведамляе LSM. Пра гэта заявіў прэзідэнт краіны Эдгарс Рынкевічс па выніках сустрэчы з прэм’еркай Эвікай Сіліняй.
Да канца года ўрад рыхтуе ацэнку наступстваў такога кроку разам з Нацыянальнымі ўзброенымі сіламі. Дэмантаж чыгункі можа стаць мерай па ўмацаванні бяспекі і абароны, аднак рашэнне будзе прымацца толькі пасля ацэнкі сацыяльна-эканамічных наступстваў і часу, неабходнага на работы.
Прэм’ерка Сіліня адзначыла, што пытанне трэба абмяркоўваць каардынавана з Літвой, Эстоніяй, Фінляндыяй і Польшчай, бо дзеянні на ўсходняй мяжы павінны быць узгодненыя з саюзнікамі.
Латвійскія вайскоўцы прапанавалі разабраць рэйкі бліжэй да Расіі як меру контрмабільнасці ў выпадку нападу. Міністэрствам транспарту, МУС і іншым структурам даручылі ацаніць магчымыя наступствы, канкрэтных тэрмінаў работ пакуль няма.
Міністр унутраных спраў Латвіі Рыхард Казлоўскіс адзначыў, што пакуль чыгунка яшчэ выкарыстоўваецца для грузаперавозак, але ў выпадку пагрозы давядзецца дзейнічаць неадкладна.
Былы міністр абароны Латвіі Арціс Пабрыкс заявіў, што «рэйкі трэба было зносіць яшчэ ўчора», бо Расія можа выкарыстоўваць іх у ваенных мэтах і для абыходу санкцый. Ён параўнаў пярэчанні адносна дэмантажу з аргументамі Еўропы пра закупку расійскіх энергарэсурсаў, нагадваючы, што краіны Балтыі адмовіліся ад расійскага газу без катастрофы для эканомікі.
Каментары