У пункце пропуску «Меднікі» літоўскія памежнікі затрымалі беларуса, абвешчанага ў міжнародны вышук праваахоўнымі органамі Германіі. Яго перадалі паліцыі Вільні, паведамляе Служба аховы дзяржаўнай мяжы Літвы.
Памежнікі высветлілі, што 35‑гадовы грамадзянін Беларусі, пасажыр аўтамабіля з расійскімі нумарамі, знаходзіцца ў вышуку Германіі. У яго пашпарце была шэнгенская віза, а праверка паказала, што месяц таму Германія выдала еўрапейскі ордар на яго арышт.
Кіроўцу і другому пасажыру дазволілі працягнуць шлях далей, а беларуса змясцілі ў часовую камеру. Падчас агляду ў яго рэчах знайшлі ноўтбук, тэлефон і больш за 6 тысяч еўра.
Сёлета супрацоўнікі літоўскай памежнай службы ўжо затрымалі 749 чалавек, якіх шукалі за злачынствы або парушэнні. Большасць затрыманых — грамадзяне Літвы, але таксама былі грамадзяне Расіі, Вялікабрытаніі, Беларусі, Латвіі і іншых краін.
Каментары