Футбаліста, які асуджаў гвалт у 2020‑м і напад на Украіну, прымусілі за гэта каяцца
Футбаліст малдаўскага «Зімбру» Мікалай Золатаў, якому міністр спорту і турызму Сяргей Кавальчук раней забараніў выступаць у чэмпіянаце Беларусі за асуджэнне гвалту сілавікоў у 2020 годзе і асуджэнне вайны ва Украіне, даў інтэрв'ю газеце «Прессбол», у якім каецца за свае ранейшыя «памылкі».
У інтэрв'ю Золатаў заяўляе пра сваё жаданне вярнуцца ў беларускую зборную, а найперш, відаць, у беларускі чэмпіянат. Дзеля гэтага ён асуджае сябе ранейшага:
«Шмат няправільнага і непатрэбнага было сказана мною на эмоцыях у мінулыя гады, за што я шчыра раскайваюся».
Адначасова ён асуджае і абмежаванні, накладзеныя на беларускі футбол пасля таго, як Расія пры падтрымцы рэжыму Лукашэнкі распачала ў лютым 2022 года паўнамаштабную вайну супраць Украіны:
«Несправядліва, калі хтосьці заводзіць размову аб поўным адхіленні нашай каманды ад міжнародных турніраў. На тэрыторыі Беларусі не адбываецца баявых дзеянняў, як, напрыклад, у Ізраілі, і такое стаўленне — перадузятае. Але рана ці позна забароны будуць знятыя і зборная Беларусі зноў атрымае права праводзіць хатнія матчы на сваім стадыёне».
31‑гадовы абаронца Мікалай Золатаў у свой час гуляў за зборную Беларусі, правёў за яе 14 матчаў у 2019‑2021 гадах.
З 2020 да 2024 года ён выступаў за мяжой (Расія, Украіна, Францыя, Казахстан). Але ў ліпені 2024‑га нечакана папоўніў шэрагі віцебскага прыватнага клуба «Макслайн». Кантракт з віцебскім клубам тады другога дывізіёна быў падпісаны да канца 2024 года, але паспеў за яго футбаліст правесці ўсяго чатыры матчы.
З 5 жніўня 2024‑га гулец перастаў не тое што выходзіць на поле, але нават трапляць у заяўку на матчы, хоць усе чатыры вышэйзгаданыя гульні адгуляў ад свістка да свістка. Як тады даведалася «Трыбуна», Золатаў не гуляў на патрабаванне Кавальчука. У канцы ліпеня віцебскаму клубу было паведамлена пра тое, што ён не можа выкарыстоўваць футбаліста, які «раней выказваў незадаволенасць дзейнай уладай Беларусі».
Таксама, са слоў крыніц, якія знаёмыя з сітуацыяй, чыноўніку не спадабалася, што Золатаў раней асуджаў вайну ва Украіне.
Яшчэ тады выказвалася меркаванне, што ад Золатава запатрабуюць «шчырага раскаяння» ў абмен на магчымасць далей гуляць у Беларусі ў футбол. Але тады ён на гэта не пайшоў, а ў гэтым годзе паехаў гуляць у малдаўскі «Зімбру». Што прымусіла наважыцца на пакаянне менавіта цяпер — можна толькі здагадвацца.
Міністр спорту Кавальчук забараніў гуляць у футбол экс-абаронцу зборнай Беларусі
Як беларускія футбалісты бягуць за доўгім рублём у блізкае (і далёкае) замежжа. І колькі там зарабляюць
«Дапамагаю Украіне як магу. Калі ні ў што не верыць, нашто тады жыць?» — беларускі футбаліст Золатаў
Гулец зборнай Беларусі па футболе: «У Беларусі цяпер мы такія ахвярныя казлы. Ніхто за нас не заўзее»
Каментары
А что тут догадываться?! Футболист из него никакой, ни таланта, ни харизмы. Если бы он из себя что-то представлял, то уже давно прописался бы в европейском клубе. А так - выкинули под сраку из Европы и приполз прощения к шайке просить. Этим он показал, что у него вдобавок и принципов нет.