Першага сакратара пасольства Беларусі ў ЗША пасадзілі за палітыку
Дзмітрый Ільюхін — ураджэнец Наваполацка, які будаваў паспяховую дыпламатычную кар'еру. У 2020‑м ён уваходзіў у выбарчую камісію ў Канадзе, і на ягоным участку Ціханоўская разграміла Лукашэнку. Пасля звальнення з дзяржаўнай службы Ільюхін працаваў у прадстаўніцтве Міжнароднага чырвонага крыжа.
Дзмітрыю Ільюхіну 35 гадоў. Ён родам з Наваполацка, дзе ў 2007‑м скончыў школу з грамадска-эканамічным ухілам.
Вышэйшую адукацыю атрымліваў у адных з найлепшых ВНУ рэгіёна: спачатку вучыўся на юрыдычным факультэце БДУ, пасля перавёўся ў прэстыжны Маскоўскі дзяржаўны інстытут міжнародных адносін (МДІМА), які скончыў у 2012 годзе. У ягоным актыве таксама стажыроўка ў Свабодным універсітэце Берліна і магістарская ступень на Факультэце міжнародных адносінаў БДУ.
Кар'еру ў Міністэрстве замежных спраў Дзмітрый пачаў у 2012 годзе. Ён працаваў аташэ ў консульскім упраўленні, пасля амаль тры гады правёў у пасольстве Беларусі ў Егіпце на пасадзе трэцяга сакратара. Калі вярнуўшыся ў Мінск, стаў першым сакратаром ва ўпраўленні Еўропы і Паўночнай Амерыкі. А ў 2019 годзе Ільюхін адправіўся ў Канаду на пасаду першага сакратара.
У Атаве ён быў членам выбарчай камісіі на прэзідэнцкіх выбарах 2020 года. Згодна з афіцыйным пратаколам, на ягоным участку разгромна перамагла Святлана Ціханоўская, якая набрала 321 голас (91%) супраць 21 голаса (6%) у Лукашэнкі.
У жніўні 2021 года Ільюхін пабыў консулам у Нью-Ёрку, а затым — першым сакратаром пасольства Беларусі ў Вашынгтоне. У красавіку 2022 года Дзмітрый пакінуў дыпламатычную службу.
Пасля звальнення з дзяржаўнай службы Дзмітрый працаваў у прадстаўніцтве Міжнароднай федэрацыі таварыстваў Чырвонага Крыжа (IFRC) у Мінску, дзе ў верасні 2024 года атрымаў павышэнне да старшага афіцэра па развіцці нацыянальнага таварыства.
На гэтай пасадзе ён фактычна быў прадстаўніком Жэневы, адказным за рэфармаванне і прафесіяналізацыю Беларускага таварыства Чырвонага крыжа. Ягоная праца прыпала на крызісны перыяд, калі IFRC прыпыніла членства БТЧК праз скандалы вакол кіраўніка арганізацыі Дзмітрыя Шаўцова. Імаверна, задачай Ільюхіна было вярнуць беларускую структуру ў рэчышча міжнародных стандартаў нейтральнасці і незалежнасці.
Невядома, калі Ільюхіна затрымалі, але адбылося гэта каля году таму. Дзмітрыя судзілі ў Мінскім гарадскім судзе за «садзейнічанне экстрэмісцкай дзейнасці» (ч. 1 і 2 арт. 361‑4 КК). Прысуд уступіў у сілу снежні 2025 года.
Цяпер мужчына адбывае пакаранне ў калоніі ці на «хіміі» з накіраваннем — у сацсетках ён не з'яўляўся каля году, а ягоны акаўнт у тэлеграме выдаліўся. Дома яго чакаюць жонка і маленькае дзіця.
«Наша Нiва» — бастыён беларушчыны
ПАДТРЫМАЦЬЦяпер чытаюць
Гістарычныя +40,4°C у Пінску — гэта толькі разагрэў. Беларусь уваходзіць у новую кліматычную эру і на вачах стане лесастэпам8
Каментары
Помсцяць, чэрці, людзям ...