Супрацоўнікі Фонду барацьбы з карупцыяй (ФБК), які ў свой час заснаваў Аляксей Навальны, высветлілі, што ў прэзідэнта Расіі Уладзіміра Пуціна з’явіўся новы палац на мысе Ая ў Крыме.
Спачатку гэты комплекс будавалі як дачу былога прэзідэнта Ўкраіны Віктара Януковіча, але пасля анексіі Крыма будаўніцтва прызналі незаконным. Аб’ект перадалі блізкім да Пуціна бізнэсменам Юрыю і Барысу Кавальчукам, пасля чаго перабудавалі ў адпаведнасці з патрабаваннямі Федэральнай службы аховы Расіі. На ўсё гэта патрацілі не менш за 10 мільярдаў расійскіх рублёў (каля 127,4 мільёна даляраў).
Па словах ФБК, цяпер палац амаль не падобны на дачу Януковіча — у параўнанні з ім яна выглядала як «халупа». У галоўным будынку ёсць зал на 233 квадратных метраў са сталом на 20 чалавек, спальня плошчай 154 квадратныя метры з мармуровай ваннай і джакузі, яшчэ адна спальня на 183 квадратныя метры.
На ніжнім паверсе знаходзіцца асабістая бальніца з некалькімі кабінетамі: там ёсць кабінет тэрапеўта з ультрагукавым апаратам, стол для агляду і масажу, абсталяванне для аналізаў, электракардыёграф і прыбор для фізіятэрапіі. Таксама ёсць кабінет стаматолага і аперацыйная з сучасным абсталяваннем, спа-цэнтр з басейнам, крыякамера, кіназала, більярдная і вінны пограб.
Побач з галоўным будынкам размешчаныя гатэльныя апартаменты, на даху якіх — парк з відам на мора, а на тэрыторыі каля 3,5 гектара — верталётная пляцоўка.
ФБК піша, што фінансавалі будаўніцтва бізнэсмен Уладзімір Колбін (сын сябра дзяцінства Пуціна), фірма «Аратрон» і кампанія «Форстыс», якая, магчыма, звязаная з Юрыем Кавальчуком. Раней «Новая газета» таксама паведамляла, што дача на мысе Ая належыць сябрам Пуціна і называла яе «дачай Кавальчука».
Цяпер чытаюць
Як склаўся лёс Яны Пачыцкай — дзяўчыны, якую затрымлівалі разам з Канавалавым і Кавалёвым па справе аб тэракце ў метро5
Каментары