Амерыканскія дэсантнікі высадзіліся на танкер Marinera, які падчас пагоні змяніў сцяг на расійскі
Амерыканскія вайскоўцы ажыццявілі захоп нафтавага танкера Marinera (раней Bella 1), які, як сцвярджаецца, звязаны з Расіяй. Гэта першы выпадак, калі амерыканцы захопліваюць судна «ценявога флоту», што ідзе пад расійскім сцягам.
Пра пачатак аперацыі паведамляе агенцтва Reuters са спасылкай на крыніцы, а таксама расійскія каналы, сярод іх RT, якія апублікавалі фота і відэа інцыдэнту. Паводле наяўнай інфармацыі, вайскоўцы, як мяркуецца — амерыканскія, высадзіліся на борт судна. Пасля гэтага танкер, які знаходзіўся ў Паўночным моры, змяніў курс на паўднёвы.
Са звестак Reuters, аперацыя праводзіцца Берагавой аховай і Узброенымі сіламі ЗША, на борт высадзіўся дэсант. У момант правядзення аперацыі ў непасрэднай блізкасці знаходзіліся расійскія вайсковыя судны, у тым ліку расійская падводная лодка. Расія выслала караблі ВМС насустрач танкеру, аднак амерыканцаў гэта не спыніла.
Міністэрства замежных спраў Расіі заявіла ТАСС, што з трывогай сочыць за сітуацыяй. У ведамстве выказалі здзіўленне, што расійскаму судну «надаецца павышаная і відавочна не суразмерная яго мірнаму статусу ўвага з боку ваенных ЗША і НАТА».
Гісторыя пераследу танкера цягнулася некалькі тыдняў. Судна, якое раней насіла назву Bella 1 і хадзіла пад сцягам Панамы, знаходзілася ў санкцыйных спісах ЗША з-за транспартавання іранскай нафты.
Канфлікт абвастрыўся ў канцы снежня, калі судна ішло ў Венесуэлу. Яно не змагло зайсці ў порт і загрузіцца нафтай, бо амерыканцы паспрабавалі здагнаць і перахапіць яго там. Тады экіпаж танкера не дазволіў амерыканскім вайскоўцам падняцца на борт, з-за чаго тыя пачалі пераслед.
Уцякаючы ад пагоні, члены экіпажа пайшлі на хітрыкі: яны намалявалі на сваім борце выяву сцяга Расіі. Праз некалькі дзён пасля інцыдэнту судна змяніла назву з Bella 1 на Marinera. Яго таксама аператыўна ўнеслі ў Расійскі марскі рэгістр суднаходства.
У адказ на пераслед, як паведамляла The Wall Street Journal са спасылкай на амерыканскага чыноўніка, Расія накіравала падводную лодку і іншыя вайсковыя марскія сродкі для суправаджэння пустога нафтавага танкера. Па звестках выдання, напярэдадні захопу судна знаходзілася прыкладна за 300 міль (~480 км) на поўдзень ад Ісландыі і рухалася ў бок Паўночнага мора, дзе яго працягвала адсочваць амерыканская берагавая ахова.
Каментары
А Вовочка думал, что Трамп забудет про унижение на Аляске? Вот Донни и поводил по губам при пацанах. Отвечать будешь, или пойдешь пацанам объяснять, что с сегодняшнего дня все в низком статусе? Все по понятиям, прямо как у вас любят.