Што адбываецца з вызваленымі каталіцкімі святарамі і чаму яны маўчаць
Амаль праз два месяцы пасля вывазу з Беларусі ў Ватыкан вызваленых каталіцкіх святароў Генрыха Акалатовіча і Анджэя Юхневіча вернікам сталі вядомыя некаторыя звесткі пра іх, піша Katolik.life.
За ўвесь гэты час не з'явілася ніякай афіцыйнай інфармацыі пра тое, што святары знаходзяцца ў Рыме, а самі яны не зрабілі ніякіх заяў, не былі заўважаныя на публіцы і амаль не выходзілі на сувязь. Цяпер стала зразумела, чаму.
Як даведаліся вернікі, святароў размясцілі ў адным з кляштараў у Рыме, дзе яны знаходзяцца ўвесь гэты час і, верагодна, будуць жыць і далей. Прычына, па якой святары рэдка выходзяць на кантакт, банальная: яны не маюць тэлефонаў і іншых тэхнічных сродкаў сувязі.
Пры гэтым яны знаходзяцца на поўным забеспячэнні, у тым ліку неабходнымі лекамі: праходзяць медыцынскае абследаванне, аднаўляюцца пасля працяглага часу зняволення. Моляцца, удзельнічаюць у святых імшах і сумуюць па Беларусі. Калі яны змогуць вярнуцца на Радзіму, невядома: канкрэтыкі ў гэтым пытанні, як і ўвогуле пра далейшы лёс святароў, пакуль няма.
Таксама пацвердзілася здагадка пра «абет маўчання». Гэта сапраўды так: у найбліжэйшыя месяцы не варта чакаць публікацый пра святароў. У Ватыкане яны далі абяцанне, што як мінімум на працягу году пасля вызвалення не будуць рабіць ніякіх заяў, выступаў і займацца якой-кольвек публічнай дзейнасцю. Хто ініцыяваў такую умову, вернікам дакладна невядома.
Валожынскага ксяндза Генрыха Акалатовіча затрымалі ў лістападзе 2023 года. Сілавікі абвінавацілі яго ў «здрадзе дзяржаве». 30 снежня 2024 года святара асудзілі да 11 гадоў калоніі.
У выпадку святара з Шуміліна, Віцебская вобласць, Анджэя Юхневіча, яго спачатку затрымалі паводле «палітычных» адміністрацыйных артыкулаў, але пазней абвінавацілі ў злачынствах, якія тычацца сэксуальнай недатыкальнасці непаўналетніх. Яго асудзілі да 13 гадоў калоніі.
Пра вызваленне абодвух стала вядома 20 лістапада. Пасля прэс-сакратарка Лукашэнкі Наталля Эйсмант паведаміла, што іх памілавалі на просьбу Папы Льва XIV.
Ксяндзы Акалатовіч і Юхневіч правялі ў Ватыкане святую імшу
З «памілаванага» ксяндза Генрыха Акалатовіча хочуць спагнаць вялізны штраф
Эйсмант: Двух каталіцкіх святароў памілавалі па просьбе Папы Льва XIV
Вызваленыя ўчора каталіцкія святары знаходзяцца ў Ватыкане
Вызваленыя каталіцкія святары Генрых Акалатовіч і Анджэй Юхневіч
«Шматпартыйнасць, плюралізм меркаванняў — гэта брахня, заходняя брахня». Лукашэнка разглядае канстытуцыйнае вяртанне да савецкай сістэмы74
Каментары