Прапануюць бясплатна пажыць на выспе ля берагоў Уэльса — тым, хто гатовы лічыць тупікаў і іншых жывёл
Гэты прыгожы, далёкі ад буйных гарадоў востраў каля ўзбярэжжа паўднёва-захаду Уэльса ў Вялікабрытаніі можа стаць вашым новым домам — калі, канешне, вы любіце лічыць тупікаў, пiша Бі-бі-сі.
Скомер — востраў ля ўзбярэжжа Пембрукшыра плошчай 1,13 квадратнай мілі (2,92 кв. км), дзе гняздуецца мноства марскіх птушак. Ён знаходзіцца пад апекай Фонду дзікай прыроды Паўднёвага і Заходняга Уэльса (WTSWW).
Паспяховыя кандыдаты змогуць правесці там некалькі месяцаў вясной, летам ці восенню і дапамагчы захаванню ўнікальнай прыроды вострава.
Каардынатар па працы з наведвальнікамі вострава Роб Нот, кажа, што мясцовыя тупікі, колькасць якіх скарачаецца, «зусім культавыя птушкі» і іх падлік — задача даволі складаная.
Нягледзячы на тое, што гэтая праца не аплачваецца, WTSWW даць супрацоўнікам бясплатнае пражыванне і аплаціць расходы на праезд да вострава і назад у межах Злучанага Каралеўства. Фонд таксама выплаціць ім штомесячную стыпендыю ў памеры ад 200 да 400 фунтаў стэрлінгаў (ад 276 даляраў да 552 даляраў).
Нот кажа, што для падліку тупікаў востраў дзеляць на ўчасткі і абыходзяць іх прыкладна за дзве гадзіны да заходу сонца — менавіта ў гэты час больш за ўсё птушак знаходзіцца на сушы.
«Мы дастаём нашы лічыльнікі і лічым усіх, хто знаходзіцца на сушы, затым тых, хто знаходзіцца ў моры, а таксама тых, хто знаходзіцца ў паветры», — дадаў ён.
Тупікі занесены ў Чырвоны спіс Міжнароднага саюза аховы прыроды (МСАП) як уразлівы да знікнення від.
«Тое, што тупікі аказаліся ў гэтым спісе, няправільна па мностве прычын і не ў апошнюю чаргу таму, што раней яны жылі зусім шчасна, таму мы робім усё, што ў нашых сілах, каб паспрабаваць павялічыць іх колькасць», — дадаў Нот.
Зараз на востраве, які з'яўляецца нацыянальным прыродным запаведнікам, адкрыты тры вакансіі для пастаянных валанцёраў і адна вакансія для валанцёра па маніторынгу марскіх птушак.
Кожны год супрацоўнікі WTSWW пералічваюць марскіх птушак на востраве і адсочваюць, колькі з іх вяртаецца вясной на гнездаванне.
У мінулым годзе арганізацыя паведаміла, што, нягледзячы на хуткае скарачэнне папуляцыі гэтых птушак у свеце, на востраве была зарэгістравана рэкордная колькасць тупікаў — 43 626 асобін.
WTSWW звязала гэты рост з багаццем ежы ў навакольных водах, што забяспечвае наяўнасць вялікай колькасці рыбы для птушанят, а таксама з адсутнасцю на востраве драпежнікаў накшталт пацукоў і ліс.
Акрамя тупікаў на Скомеры жывуць яшчэ 350 тыс. гнездавых пар буравеснікаў і тысячы кайр і гагар.
«Вясной асноўная ўвага надаецца нашым гнездавым марскім птушкам, гэта значыць падліку колькасці тупікаў і дапамозе ў падліку іншых відаў марскіх птушак з лодкі», — гаворыцца ў аб'яве аб вакансіі.
«Улетку ўвага пераключаецца на паспяховасць вывядзення птушанят, а восенню ў цэнтры нашай увагі знаходзіцца маніторынг шэрых цюленяў і некаторых іншых відаў, уключаючы скомерскіх палёвак, рэптылій, кітападобных і начных матылькоў», — гаворыцца ў аб'яве.
Валанцёры будуць праводзіць на востраве прыкладна па тры месяцы ў перыяд з канца сакавіка да канца верасня, а супрацоўнік па маніторынгу марскіх птушак з 23 мая па 23 чэрвеня.
У залежнасці ад сезона валанцёрам таксама можа быць даручана ўдзельнічаць у падліку марскіх птушак з лодкі, сачыць за паспяховасцю вываду птушанят або праводзіць маніторынг шэрых цюленяў.
WTSWW паведаміла, што яны таксама будуць уцягнутыя ў паўсядзённую працу на востраве і дапамагаць прымаць каля 25 тысяч яго штогадовых наведвальнікаў.
Паводле звестак дабрачыннай арганізацыі Marine Conservation Society, воды ля ўзбярэжжа вострава Скомер і паўвострава Марлоўс утвараюць адзіную ва Уэльсе марскую прыродаахоўную зону (са статусам Marine Conservation Zone).
Дзе знаходзіцца востраў Скомер?
Скомер размешчаны прыкладна ў мілі ад узбярэжжа Пембрукшыра на паўднёвым захадзе Уэльса.
На востраве няма крам, таму ежу і прадметы першай неабходнасці ўсе наведвальнікі павінны прывозіць з сабой.
Хто жыве на Скомеры?
На Скомеры няма пастаянных жыхароў, але сезонныя супрацоўнікі WTSWW праводзяць там прыкладна дзевяць месяцаў у годзе.
Абмежаваная колькасць месцаў для начлегу на востраве даступная ў хостэле WTSWW.
Як дабрацца да вострава Скомер?
На Скомер ходзяць лодкі: з красавіка па жнівень яны адпраўляюцца кожныя паўгадзіны паміж 10:00 і 12:00, а зваротныя рэйсы пачынаюцца з 15:00.
Як паведамілі ў WTSWW, у верасні лодкі да вострава ходзяць радзей, у залежнасці ад попыту, а па пятніцах дзённых рэйсаў няма наогул.
Каментары