Белпол: «Эпштэйн не даехаў да Беларусі». А кім былі бацькі яго каханкі Карыны Шуляк?
Нягледзячы на тое, што скандальна вядомы амерыканскі фінансіст Джэфры Эпштэйн некалькі разоў атрымліваў візу ў Беларусь, ён усё ж не быў у нашай краіне. Такой інфармацыяй з «Нашай Нівай» падзяліліся ў Belpol.
Пра асуджанага за сэксуальныя злачынствы фінансіста Джэфры Эпштэйна, які здзейсніў самагубства ў турэмнай камеры ў Нью-Ёрку ў 2019 годзе, гучна загаварылі зноў: Міністэрства юстыцыі ЗША днямі апублікавала чарговую, маштабную порцыю дакументаў па яго справе.
Сярод іншага, там ёсць скрыншоты ліставання Эпштэйна з Карынай Шуляк — беларускай дантысткай, з якой яны былі знаёмыя з 2010 года. Выпускніца БДМУ прыехала ў ЗША ў 2009 годзе — тады дзяўчыне было 20 гадоў.
У 2010‑м Эпштэйн якраз вызваліўся з турмы, прабыўшы там 13 месяцаў па абвінавачванні ва ўцягванні непаўналетняй у прастытуцыю. Па інфармацыі мясцовых СМІ, Шуляк аказалася ледзь не адзінай, хто быў з ім тады побач: шматлікія прыяцелі і знаёмыя адвярнуліся ад бізнэсмена праз сэксуальны скандал.
У якасці падзякі Эпштэйн дапамог Шуляк атрымаць ліцэнзіі для працы дантыстам у ЗША, аплаціў дарагое лячэнне маці, а ў выніку ўключыў у завяшчанне: беларусцы дасталіся 50 мільёнаў даляраў і цэлы букет нерухомасці, сярод якой і ўласнасць Эпштэйна на скандальна вядомым востраве Літл-Сент-Джэймс і суседнім Грэйт-Сент-Джэймс.
Беларуска была важным чалавекам у жыцці мільянера: яны планавалі ажаніцца, да таго ж Карына стала апошнім чалавекам, з якім ён паспеў паразмаўляць перад смерцю. Хаця іх стасункі, відавочна, нельга было назваць простымі: са злітай прыватнай перапіскі паміж фінансістам і дантысткай бачна, што яны нярэдка канфліктавалі.
Адзін з момантаў, які давёў дзяўчыну да слёз, наколькі можна зразумець з дыялогу, звязаны са спрэчкай наконт прыватнасці Эпштэйна ў масажным кабінеце і яго цягі да маладых дзяўчат.
«Я стараюся настолькі, наколькі магу, разумець твае клопаты — узрост Джэсікі, маю схільнасць звяртаць увагу на маладзейшых жанчын, тое, што будзе праз дзесяць гадоў; тваё рыданне замест удзячнасці за наша ўзаемнае каханне; тваё рыданне, а потым адпраўку мне паведамлення, у якім ты тлумачыш, якую шкоду я, на тваю думку, прычыніў твайму дню», — піша Эпштэйн.
А што з бацькамі Карыны Шуляк?
На скрыншоце з запытам у консульства па візы бачна, што Карына хацела прыехаць дадому і прыняць у сябе Эпштэйна ў маі 2016 года. «Містар Эпштэйн збіраецца спыніцца ў маёй сям’і ў Мінску, а таксама ён хоча купіць кватэру».
Па інфармацыі Belpol, Эпштэйн па нейкіх прычынах у Беларусь так і не даехаў. Але кватэра ў выніку ўсё ж была купленая.
Згодна з базамі валодання нерухомасцю, на бацьку Карыны Фёдара Шуляка, які значыцца прадпрымальнікам, у Мінску зарэгістраваная кватэра ў раёне Каменнай Горкі, а на маці Таццяну, якая, згодна з апошнімі вядомымі звесткамі была беспрацоўнай — кватэра ў Драздах і дом у Віцебскай вобласці.
Акурат кватэра ў Драздах была набытая ў 2016 годзе, што бачна па Адзіным дзяржаўным рэгістры нерухомай маёмасці.
Сама Карына нарадзілася ў вёсцы Валяр’янава пад Мінскам, а падчас меркаванага прыезду Эпштэйна планавала размясціць яго ў зусім іншым сямейным гняздзе — на вуліцы Карыцкага ў раёне метро «Партызанская».
Дадаткова ўжо вядома, што ў 2013 годзе Эпштэйн перавёў на рахунак Фёдара Шуляка 20 тысяч даляраў, і яшчэ па 25 тысяч у 2014‑м і 2016‑м гадах, пісала «Люстэрка».
Шулякі-старэйшыя пазнаёміліся з каханкам дачкі асабіста, самі прыляцеўшы ў ЗША: адзін з вядомых візітаў сям’і ў ЗША датуецца 2012 годам, таксама Фёдар і Таццяна наведвалі Амерыку ў 2017 годзе. Апошні ж раз бацька Карыны быў у патэнцыйнага зяця за месяц да арышту.
Цяпер, згодна з інфармацыяй экс-сілавікоў, бацькі Шуляк у разводзе.
«Наша Нiва» — бастыён беларушчыны
ПАДТРЫМАЦЬ18‑гадовы курсант Вайсковай акадэміі з Ляхавіч нікому нічога не сказаў, забраў дакументы і паехаў ваяваць за Расію. Цяпер па ім плачуць44
Каментары