Цэлая група індыйцаў просіць улады Індыі ўратаваць іх з Беларусі
У Беларусі апынулася група з дзевяці грамадзян Індыі, якія застаюцца без працы і належнага пражывання, і цяпер яны просяць урад Індыі дапамагчы ім вярнуцца на радзіму, паведамляе выданне Reform.news са спасылкай на індыйскае выданне The Hindu.
Жонка аднаго з індыйцаў, Т. Тхангасвамі, расказала, што яе муж у снежні 2025 года паехаў у Беларусь праз агенцтва працаўладкавання, заплаціўшы 400 тысяч рупій (каля 4400 даляраў). За амаль два месяцы знаходжання ў Беларусі яму не далі ні працы, ні жылля, ні харчавання.
Сам Тхангасвамі паведаміў, што спачатку агенцтва абяцала яму працу ў Ізраілі, але пасля атрымання грошай перастала выходзіць на сувязь. Толькі праз год яго і іншых работнікаў накіравалі ў Беларусь.
Індыйцы скардзяцца, што агенцтва не дае ясных адказаў, а яны сутыкаюцца з «вялікімі цяжкасцямі ў чужой краіне» з моцнымі снегападамі. Яны просяць урад Індыі вырашыць іх праблему і дапамагчы вярнуцца дадому.
Раней у такой жа сітуацыі была жанчына з той жа Індыі, якая таксама паехала ў Беларусь праз агенцтва і засталася без працы і грошай. Пасля таго, як яе гісторыя трапіла ў СМІ, умяшаліся беларускія сілавікі, пасля чаго жанчына змагла вярнуцца на радзіму.
Цяпер чытаюць
Някляеў апублікаваў злабадзённы верш. У ім згадваецца і Калеснікава з Бабарыкам, і Ціханоўская, і Пракоп'еў з Пазняком13
Каментары