Акцёра Шая Лабафа арыштавалі за бойку падчас святкавання масленіцы ў Новым Арлеане
Па словах паліцэйскіх, зорка фільмаў «Трансформеры», «На кручку» і «Німфаманка» уда́рыў двух чалавек каля аднаго з бараў на Роял-стрыт падчас святкаванняў Масленіцы (карнавалу), піша Бі-бі-сі.
Як паведамілі ў паліцыі Новага Арлеана, 39‑гадовага Лабафа выгналі з установы пасля таго, як ён зладзіў там дэбош.
Дэпартамент паліцыі Новага Арлеана пацвердзіў, што прыкладна а 12:45 ночы паліцэйскія былі выкліканыя ў раён Фабург Марыньі, размешчаны побач з Французскім кварталам, дзе знаходзіўся эпіцэнтр свята.
Згодна з судовымі дакументамі, менеджар бара хацеў вывесці Лабафа з установы, але акцёр паспрабаваў ударыць яго.
Затым, пасля таго як яго вывелі, Лабаф нібыта ўдарыў кулаком аднаго з наведвальнікаў, які дапамагаў менеджару бара, а пазней вярнуўся і ўдарыў другога мужчыну ў нос.
«Некалькі чалавек паспрабавалі ўтрымаць яго на падлозе — яго ў канчатковым выніку адпусцілі ў надзеі, што ён сыдзе, — але, як паведамляецца, ён зноў ударыў таго ж пацярпелага, наносячы ўдары кулакамі ў верхнюю частку цела. Затым Лабаф, па паведамленнях, атакаваў іншага чалавека — ударыўшы яго ў нос», — гаворыцца ў прэс-рэлізе паліцыі.
Відавочцы ўтрымлівалі Лабафа да прыбыцця паліцыі, пасля чаго яго даставілі ў бальніцу. Пазней яго выпісалі, арыштавалі і выставілі абвінавачванні па двух пунктах аб нанясенні пабояў.
Паведамленні аб неналежных паводзінах Лабафа па ўсім Новым Арлеане з'яўляліся на працягу некалькіх дзён. Работнік мясцовага бара Ms Mae's Роберт Скуз, расказаў часопісу Hollywood Reporter, што акцёр прыйшоў туды ў «некалькі канфліктным стане».
«У разгар бойкі ён выдаў фразу: «Ты ведаеш, хто я такі?»», — расказаў Скуз.
Паведамляецца, што Лабафа папрасілі сысці пасля таго, як ён паспрабаваў прайсці за барную стойку і наліць напоі наведвальнікам.
Лабаф раней расказваў аб сваіх праблемах з алкаголем. Пасля арышту ў 2017 годзе ў Саване, штат Джорджыя, ён прайшоў курс рэабілітацыі па рашэнні суда і гэты досвед натхніў яго на стварэнне паўаўтабіяграфічнага фільма «Мілы хлопчык».
Тым не менш у 2020 годзе англійская спявачка і партнёрка акцёра па гэтым фільме FKA twigs, сапраўднае імя якой Талія Барнет, падала на яго ў суд, абвінавачваючы Лабафа ў сексуалізаваным гвалце, нападзе і прычыненні эмацыйнай шкоды.
У пазове і ў інтэрв'ю New York Times Барнет заявіла, што Лабаф, з якім яна сустракалася з 2018 па 2019 год пасля знаёмства на здымках фільма «Мілы хлопчык», свядома падверг яе рызыцы заражэння інфекцыяй, якая перадаецца палавым шляхам, спрабаваў задушыць і ўдарыў аб аўтамабіль. Лабаф адмаўляе ўсе абвінавачванні ў свой адрас. У ліпені 2025 года бакі дасягнулі пазасудовага пагаднення.
Прадстаўнікі Лабафа пакуль не каментавалі СМІ тое, што адбылося.
«Мама, давай напішам заяву ў міліцыю, ён мяне ўжо дастаў». Маці школьніка з Брэста, які скончыў жыццё самагубствам, расказала пра цкаванне сына8
Каментары