Гэты серыял абмяркоўвае ўвесь жаночы Threads. І рыхтуецца пераймаць стыль галоўнай гераіні
Самы гарачы кінараман года, серыял «Гісторыя кахання» (Love Story), расказвае пра сына прэзідэнта ЗША і кансультантку моднага брэнду. У ім грае і праўнучка Хемінгуэя.
«Гісторыя кахання» — пяты праект з буйной франшызы «Амерыканская гісторыя», што аб’ядноўвае серыялы пра вядомыя выпадкі з сучасных і амаль сучасных ЗША. Раней для франшызы здымалі серыялы ў жанры жахаў, тру-крайм і невялічкую спартыўную драму.
Цяпер стваральнікі франшызы выйшлі з тых нішавых жанраў і ўзяліся за гісторыі кахання. Для першага сезона ўзялі сапраўдны раман Джона Кенэдзі-малодшага, сына амерыканскага прэзідэнта Джона Кенэдзі, забітага Лі Харві Освальдам у 1963-м.
У пачатку гэтай гісторыі Кенэдзі-малодшаму 31 год, і ён — ледзь не амерыканскі прынц: СМІ сочаць за кожным яго крокам, а сам ён сярод самых зайздросных халасцякоў ЗША, якому прыпісваюць раманы з топавымі зоркамі. Джон нарадзіўся праз два тыдні пасля таго, як яго бацьку абралі прэзідэнтам, і зразумела, што ён рос на вачах усёй краіны.
Да гэтага дадамо, што пасля забойства яго бацькі сям’я Кенэдзі на дзесяцігоддзі апынулася ў цэнтры ўвагі амерыканцаў — можна параўнаць з тым, як брытанцы сочаць за навінамі пра сваю каралеўскую сям’ю.
У 1992‑м Кенэдзі — памочнік пракурора, які спрабуе здаць экзамен на права працаваць адвакатам. Ён сустракае Кэралін Бесет, узыходзячую зорку моднага брэнда Calvin Klein. Бесет, дачка сталяра і чыноўніцы, распачынала як простая прадаўшчыца ў краме Calvin Klein. Па стане на 1992 год яна дарасла да моднай кансультанткі, якую брэнд накіроўваў працаваць з багатымі кліентамі.
Той самы Кэлвін Кляйн і знаёміць Кенэдзі з Бесет. Першая сустрэча, аднак, сканчваецца нічым, бо Кенэдзі знаходзіцца ў адносінах з актрысай Дэрыл Хана — яе грае Дры Хемінгуэй, праўнучка таго самага пісьменніка Эрнэста Хемінгуэя.
Але вернемся да гісторыі кахання. У 1994‑м Джон і Кэралін пачынаюць сустракацца, і медыя з задавальненнем смакуюць любую дэталь пра іх адносіны — напрыклад, пішуць пра тое, дзе яны абедаюць, і дзяжураць пад вокнамі іх кватэры.
Каб схавацца ад журналістаў, ім давялося ладзіць вяселле на аддаленым востраве ў амерыканскай глушы. Да самага канца гэтай гісторыі ў 1999 годзе пара заставалася пад моцным прэсінгам СМІ. Скончылася ўсё трагічна — Кенэдзі і Бесет загінулі ў авіякатастрофе.
Калі казаць пра рэйтынгі, «Гісторыя кахання» не хапае зорак з неба. На платформе IMDb, напрыклад, у праекта 7,7 балаў з 10 — няблага, але бывае і лепш.
Затое ў сацсетках праект прынялі добра: здаецца, яго абмяркоўвае ўвесь жаночы Threads, у тым ліку па-беларуску. І больш за ўсё жанчынам спадабаўся стыль праекта, што і не дзіўна: усё-ткі галоўная гераіня — супрацоўніца зорнага моднага дома і ікона моды таго часу. Стыль гераіні — мінімалізм з 90-х, простыя лініі і тотал блэк — так чапляе глядачак, што яны абмяркоўваюць, дзе можна набыць прадметы адзення экраннай Кэралін Бесет.
Эстэтыка гэтага праекта не сканчваецца на адной гераіні, бо стваральнікі серыяла прыгожа аднаўляюць дэталі побыту 90-х. А тыя глядачкі, хто ідзе глыбей за карцінку, абмяркоўваюць і саму гісторыю кахання галоўных герояў: маўляў, ці сапраўды гэта пра вялікае каханне або хутчэй пра таксічныя адносіны?
Феміністка і вядучая «Обычного утра» Марына Ментусава таксама не прайшла міма серыяла.
«Ідэальны серыял на пачатак вясны. Girls, я ледзь прымусіла сябе ісці спаць», — напісала яна ў сторыс.
«Наша Нiва» — бастыён беларушчыны
ПАДТРЫМАЦЬЦяпер чытаюць
«Вы прыйшлі сюды лохамі, а станеце драпежнікамі». Як працуюць мінскія кол-цэнтры скамераў5
Каментары