Літоўскія перавозчыкі звярнуліся ў Еўракамісію адносна затрыманых у Беларусі фур
Літоўская асацыяцыя перавозчыкаў Linava, якая аб’ядноўвае частку транспартных кампаній краіны, звярнулася ў Еўрапейскую камісію з нагоды затрыманых у Беларусі грузавых аўтамабіляў і нанесенай маёмаснай шкоды. Паводле ацэнак арганізацыі, страты могуць складаць каля 22 мільёнаў еўра, паведамляе LRT.
Па звестках асацыяцыі, цяпер на тэрыторыі Беларусі знаходзіцца не менш за 1 070 затрыманых транспартных сродкаў, што належаць 149 літоўскім кампаніям. Сярод іх — 496 цягачоў і 575 паўпрычэпаў і іншай тэхнікі. Ацэненая вартасць ужо ідэнтыфікаванай маёмасці складае каля 15,9 мільёна еўра. Акрамя таго, яшчэ шэсць кампаній паведамілі, што ў Беларусі могуць знаходзіцца яшчэ каля 401 адзінкі транспарту.
Калі гэтыя звесткі пацвердзяцца, агульная колькасць затрыманых машын можа дасягнуць 1 470, а іх кошт — амаль 22 мільёны еўра.
Раней прадстаўнікі Linava заяўлялі, што агульныя страты перавозчыкаў могуць дасягаць 100 мільёнаў еўра. Паводле іх інфармацыі, беларускія органы працягваюць спаганяць дадатковыя плацяжы — да 120 еўра за суткі за кожную адзінку транспарту.
У сваім звароце да Еўракамісіі асацыяцыя заклікала афіцыйна ацаніць сітуацыю і магчымыя парушэнні эканамічных інтарэсаў Еўрасаюза, а таксама распачаць скаардынаваныя дыпламатычныя і прававыя крокі для вяртання транспартных сродкаў. Акрамя таго, прапанавана разгледзець механізмы кампенсацыі нанесенай шкоды і праінфармаваць краіны ЕС і перавозчыкаў пра павышаныя рызыкі працы ў Беларусі. Linava заявіла пра гатоўнасць перадаць Еўракамісіі падрабязныя звесткі па кожнай кампаніі і разлікі страт.
Крызісная сітуацыя на мяжы ўзнікла пасля таго, як з Беларусі на працягу некалькіх месяцаў ляцелі кантрабандныя паветраныя шары. У выніку ўрад Літвы летась закрыў два памежныя пункты пропуску. Пазней беларускія ўлады забаранілі рух літоўскіх грузавікоў па тэрыторыі краіны, і частка транспарту засталася на спецыяльных стаянках з аплатай за захоўванне. Нягледзячы на тое, што два пункты пропуску пазней былі зноў адкрытыя раней запланаванага тэрміну, затрыманым грузавікам не дазволілі пакінуць тэрыторыю Беларусі.
Цяпер чытаюць
Мабільным аператарам забаранілі заганяць беларусаў у вялікі мінус8
Каментары