«Мы цалкам разумеем, якая там дзяржава». Літоўскія перавозчыкі не збіраюцца падаваць пазовы ў беларускія суды праз затрыманыя фуры

Эрландас Мікенас адзначыў, што пасля размоў з сямю адвакацкімі канторамі пазіцыя «Лінавы» змянілася: галоўнай мэтай цяпер з’яўляюцца не пазовы, а пошук агульнага рашэння разам з урадам. Мікенас выказаў спадзяванне, што ў выніку пераможа здаровы сэнс і бакі змогуць выйсці з крызіснай сітуацыі шляхам дамоўленасцяў.

Раней на гэтым тыдні кіраўнік асацыяцыі заяўляў, што больш за сто транспартных кампаній былі гатовыя далучыцца да калектыўнага пазову, бо на мяжы з Беларуссю працягвалі затрымлівацца грузавікі. Аднак цяпер «Лінава» больш схіляецца да супольнай працы з урадам.

Паводле Мікенаса, мэта перавозчыкаў — падштурхнуць улады да рэальных дзеянняў, бо дагэтуль, на яго думку, адбываецца толькі ўзаемнае перакіданне адказнасці і абвінавачанні. Замест гэтага бізнэс чакае канструктыўнага дыялогу і пошуку рашэнняў, якія дазволілі б перавозчыкам падтрымаць урад.

Пры гэтым кіраўнік «Лінавы» зноў адхіліў прапановы палітыкаў падаваць пазовы супраць Беларусі. Ён падкрэсліў, што крызіс узнік у выніку палітычных пастаноў, таму менавіта літоўская ўлада павінна першай узяць на сябе ініцыятыву па яго вырашэнні. Мікенас адзначыў, што судзіцца ў Беларусі фактычна немагчыма з-за тамтэйшага стану прававой сістэмы.

«Беларусі пазоваў мы не выстаўляем. Мы ўзаемадзейнічаем з пэўнымі беларускімі інстытуцыямі на ўзроўні асацыяцый і цалкам разумеем, якая там дзяржава, які прававы «беспредел». Здаецца, што магчымасцяў для судовых разглядаў там у нас проста няма», — запэўніў прадстаўнік літоўскіх перавозчыкаў.

Таксама ён раскрытыкаваў спосаб камунікацыі літоўскага ўрада з перавозчыкамі, заявіўшы, што абмеркаванне праблем праз СМІ, а не за сталом перамоў, выглядае абсурдна і можа нашкодзіць інтарэсам Літвы. Паводле яго слоў, беларускія ўлады бачаць і чуюць усе публічныя заявы, што можа быць выкарыстана супраць саміх перавозчыкаў і краіны ў цэлым.

Акрамя таго, Мікенас адзначыў, што перавозчыкі не атрымліваюць прамой інфармацыі пра тое, якія крокі ўрад робіць для вяртання грузавікоў з Беларусі. З-за гэтага ствараецца ўражанне, што ніякіх рэальных дзеянняў не вядзецца, а праблемы галіны ігнаруюцца.

Крызіс на беларуска-літоўскай мяжы ўзнік пасля таго, як Беларусь некалькі месяцаў выкарыстоўвала кантрабандныя паветраныя шары для парушэння паветранай прасторы Літвы. У адказ літоўскі ўрад у канцы кастрычніка мінулага года закрыў пункты пропуску ў Медніках і Салечніках. Пасля гэтага рэжым Лукашэнкі забараніў літоўскім грузавікам рухацца па тэрыторыі краіны, у выніку чаго многія машыны былі вымушаны стаяць на спецыяльных пляцоўках за плату. Сітуацыя не вырашылася і пасля таго, як літоўскі ўрад адкрыў мяжу, не чакаючы заканчэння ад пачатку прызначанага месячнага тэрміну.

• 0
• 0
• 1
• 0
• 0
• 2
• 0
• 0