Дальнабойшчыка з Дружнага, які працаваў у Еўрасаюзе, асудзілі па палітычнай справе
Мікіта Пуцыла 14 гадоў працаваў у сферы грузаперавозак у Беларусі і Расіі. З часам ён перайшоў на еўрапейскі кірунак. Яго арыштавалі падчас вяртання дадому ў чэрвені 2025 года.
Мікіце Пуцылу 40 гадоў. Ён родам з пасёлка Дружны Пухавіцкага раёна Мінскай вобласці. З 2011 года мужчына працаваў як індывідуальны прадпрымальнік — меў уласныя бусы і займаўся дастаўкай грузаў па Беларусі і Расіі.
У 2024‑м Мікіта адвучыўся на правы катэгорыі «СЕ» і вырашыў падацца ў еўрапейскія дальнабойшчыкі. У маі ён пачаў працаваць у літоўскім лагістычным гіганце Girteka, а далей падумваў рушыць кіроўцам у Канаду.
У тэлеграм-чатах мужчына шмат дапамагаў іншым кіроўцам: раіў, як адкрыць рахункі ў Еўрасаюзе, зрабіць візу ці купіць танны інтэрнэт у роўмінгу. Свой ад'езд ён тлумачыў тым, што ў Беларусі не бачыў працоўных і асабістых перспектыў.
Па-за працай Мікіта захапляецца цяжкай музыкай — ад гуртоў Slayer і Vader да беларускіх фолк-металістаў Drygva і Irdorath. У яго сацсетках ёсць фотаздымкі з розных тэматычных фэстаў.
Мікіту арыштавалі і змясцілі ў СІЗА ў канцы чэрвеня 2025 года. Адбылося гэта падчас вяртання ці адразу пасля вяртання дадому.
Мужчыну судзілі ў Мінскім абласным судзе па абвінавачанні ў «садзейнічанні экстрэмізму» (ч. 1 і ч. 2 арт. 361‑4 КК). Па звестках праваабаронцаў, пераслед звязаны са справай Гаюна.
Выглядае, што яму прысудзілі пакаранне, звязанае з пазбаўленнем волі.
«Наша Нiва» — бастыён беларушчыны
ПАДТРЫМАЦЬЦяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары