Шашлыкі на майскія святы. Параўноўваем цэны ў Беларусі і Польшчы

З прадуктаў выбіраем мяса — курынае філе, сцёгны, свініну і каўбаскі для грылю. З гародніны — бульбу, цыбулю, агуркі, памідоры і радыску. З соусаў — кетчуп і маянэз. Таксама бяром прыправу для мяса, хлеб, мінералку і квас.

Закупляемся анлайн — у дастаўцы беларускага «Еўраопта» і польскага «Ашана».

Еўраопт

Дадаём у кошык кілаграм курынага філе ад «Пятруха» за 13,4 рубля. Затым сцягна ад «Дзяржынкі» — па 11,54 за кіло. Са свініны лапатачную частку — яна зараз на зніжцы і абыдзецца ў 17,99 рубля за кіло. Таксама глядзім каўбаскі для грылю: свіныя ад мясакамбіната «Слонімскі» абыдуцца ў 20,83 рубля за кг.

Пераходзім у аддзел гародніны. На зніжцы зараз расійскія памідоры — бяром кіло за 4,39 рубля. Таксама адпраўляем у кошык «гладкія» агуркі — яны зараз таннейшыя, чым «калючыя», і абыдуцца нам у 6,99 рубля за кілаграм.

На гарнір шукаем кіло бульбы — гэта 1,07 рубля (самы бюджэтны варыянт). Таксама глядзім радыску: у наяўнасці расійская, італьянская і беларуская. Бяром нашу — 500 грамаў за 5,29 рубля.

Павялічыць

Для марынаду таксама купляем рэпчатую цыбулю — кіло абыдзецца ў 1,68 рубля. Для салаты глядзім пёры зялёнай — 70 грамаў «Фермерскай» за 1,89 рубля. Згадваем і пра прыправу для мяса. Выбіраем лідскую за 1,59.

З соусаў бяром 400 г маянэзу «Правансаль». Ён зараз на зніжцы за 2,99. Таксама кладзём у кошык кетчуп «Heinz» — 800 г за 12,49 рубля.

Застаўся хлеб і напоі. Хлеб «Крывіцкі» — гэта плюс 1,56 да нашай сумы. Мінералка «Мінская» абыдзецца ў 1,82 рубля за 1,5 літра. Квас, па класіцы, «Лідскі» — паўтара літра за 3,89.

Выніковая сума прадуктовага кошыка: 109,41 рубля.

Ашан

Кілаграм курынага філе ў «Ашане» абыдзецца ў 26,9 злотага або 20,8 беларускага рубля (тут і далей па курсе на 29 красавіка). Столькі ж курыных сцёгнаў — 14,98 злотага (11,6 руб.). Лапатачная частка свініны каштуе 18,99 злотага (14,7 руб.) за кіло, а свіныя каўбаскі для грылю — 23,99 злотага або 18,6 рубля.

Самыя недарагія памідоры ў дастаўцы — 10,99 злотага (8,5 рубля) за кілаграм. «Гладкія» агуркі прадаюцца паштучна — па 2,39 злотага. Адзін такі агурок важыць прыкладна 210 г, так што бяром пяць: кілаграм абыдзецца прыкладна ў 11,4 злотага (8,8 рубля).

Такая ж сітуацыя з радыскай — яна прадаецца па адной звязцы (каля 150 г) і каштуе 2,89 злотага. То-бок, кіло выйдзе прыкладна ў 19,3 злотага (каля 15 рублёў).

Следам у кошык адпраўляецца бульба — 1,98 злотага (1,5 руб.). Рэпчатая і зялёная цыбуля — 1,99 і 2,99 злотага (2,3 руб.) адпаведна. Прыправа для мяса абыдзецца ў 1,74 злотага або 1,35 рубля.

Пераходзім да соусаў. Маянэз (400 г) — 8,78 злотага (6,8 рубля), кетчуп «Heinz» — 16,99 злотага (каля 13 рублёў) за 1000 г (800 г, як у Беларусі, няма). Паўкілаграмовы хлеб «Вясковы» (Wiejski) за 4,39 злотага (3,4 руб.).

Засталіся напоі. Паўтара літра мінералкі ў польскім «Ашане» каштуюць 1,18 злотага (90 капеек). А вось квас у палякаў не так папулярны, як у беларусаў. Аднак тут прадаецца «Славянскі», які і па дызайне, і па смаку нагадвае «Лідскі». Паўтара літра — 13,69 злотага (каля 10,5 рубля).

Выніковая сума прадуктовага кошыка: 180,2 злотага. Гэта прыкладна 140 беларускіх рублёў.

Колькі такіх прадуктовых кошыкаў могуць дазволіць сабе беларусы і палякі?

Згодна з афіцыйнай статыстыкай, сярэдняя зарплата ў Беларусі да выплаты падаткаў складае 2 975,8 рубля. Гэта прыкладна 2588 рублёў чыстымі. На гэтыя грошы можна купіць 23,65 такіх прадуктовых кошыкаў.

У Польшчы сярэдняя зарплата чыстымі складае 6700 злотых (5200 беларускіх рублёў). На гэтыя грошы можна купіць 37,1 прадуктовага кошыка.

• 2
• 0
• 0
• 2
• 1
• 0
• 0
• 0