Šašłyki na majskija śviaty. Paraŭnoŭvajem ceny ŭ Biełarusi i Polščy

Z praduktaŭ vybirajem miasa — kurynaje file, ściohny, śvininu i kaŭbaski dla hrylu. Z harodniny — bulbu, cybulu, ahurki, pamidory i radysku. Z sousaŭ — kietčup i majanez. Taksama biarom prypravu dla miasa, chleb, minierałku i kvas.

Zakuplajemsia anłajn — u dastaŭcy biełaruskaha «Jeŭraopta» i polskaha «Ašana».

Jeŭraopt

Dadajom u košyk kiłahram kurynaha file ad «Piatrucha» za 13,4 rubla. Zatym ściahna ad «Dziaržynki» — pa 11,54 za kiło. Sa śvininy łapatačnuju častku — jana zaraz na źnižcy i abydziecca ŭ 17,99 rubla za kiło. Taksama hladzim kaŭbaski dla hrylu: śvinyja ad miasakambinata «Słonimski» abyducca ŭ 20,83 rubla za kh.

Pierachodzim u adździeł harodniny. Na źnižcy zaraz rasijskija pamidory — biarom kiło za 4,39 rubla. Taksama adpraŭlajem u košyk «hładkija» ahurki — jany zaraz tańniejšyja, čym «kalučyja», i abyducca nam u 6,99 rubla za kiłahram.

Na harnir šukajem kiło bulby — heta 1,07 rubla (samy biudžetny varyjant). Taksama hladzim radysku: u najaŭnaści rasijskaja, italjanskaja i biełaruskaja. Biarom našu — 500 hramaŭ za 5,29 rubla.

Pavialičyć

Dla marynadu taksama kuplajem repčatuju cybulu — kiło abydziecca ŭ 1,68 rubla. Dla sałaty hladzim piory zialonaj — 70 hramaŭ «Fiermierskaj» za 1,89 rubla. Zhadvajem i pra prypravu dla miasa. Vybirajem lidskuju za 1,59.

Z sousaŭ biarom 400 h majanezu «Pravansal». Jon zaraz na źnižcy za 2,99. Taksama kładziom u košyk kietčup «Heinz» — 800 h za 12,49 rubla.

Zastaŭsia chleb i napoi. Chleb «Kryvicki» — heta plus 1,56 da našaj sumy. Minierałka «Minskaja» abydziecca ŭ 1,82 rubla za 1,5 litra. Kvas, pa kłasicy, «Lidski» — paŭtara litra za 3,89.

Vynikovaja suma praduktovaha košyka: 109,41 rubla.

Ašan

Kiłahram kurynaha file ŭ «Ašanie» abydziecca ŭ 26,9 złotaha abo 20,8 biełaruskaha rubla (tut i dalej pa kursie na 29 krasavika). Stolki ž kurynych ściohnaŭ — 14,98 złotaha (11,6 rub.). Łapatačnaja častka śvininy kaštuje 18,99 złotaha (14,7 rub.) za kiło, a śvinyja kaŭbaski dla hrylu — 23,99 złotaha abo 18,6 rubla.

Samyja niedarahija pamidory ŭ dastaŭcy — 10,99 złotaha (8,5 rubla) za kiłahram. «Hładkija» ahurki pradajucca paštučna — pa 2,39 złotaha. Adzin taki ahurok važyć prykładna 210 h, tak što biarom piać: kiłahram abydziecca prykładna ŭ 11,4 złotaha (8,8 rubla).

Takaja ž situacyja z radyskaj — jana pradajecca pa adnoj źviazcy (kala 150 h) i kaštuje 2,89 złotaha. To-bok, kiło vyjdzie prykładna ŭ 19,3 złotaha (kala 15 rubloŭ).

Śledam u košyk adpraŭlajecca bulba — 1,98 złotaha (1,5 rub.). Repčataja i zialonaja cybula — 1,99 i 2,99 złotaha (2,3 rub.) adpaviedna. Pryprava dla miasa abydziecca ŭ 1,74 złotaha abo 1,35 rubla.

Pierachodzim da sousaŭ. Majanez (400 h) — 8,78 złotaha (6,8 rubla), kietčup «Heinz» — 16,99 złotaha (kala 13 rubloŭ) za 1000 h (800 h, jak u Biełarusi, niama). Paŭkiłahramovy chleb «Viaskovy» (Wiejski) za 4,39 złotaha (3,4 rub.).

Zastalisia napoi. Paŭtara litra minierałki ŭ polskim «Ašanie» kaštujuć 1,18 złotaha (90 kapiejek). A voś kvas u palakaŭ nie tak papularny, jak u biełarusaŭ. Adnak tut pradajecca «Słavianski», jaki i pa dyzajnie, i pa smaku nahadvaje «Lidski». Paŭtara litra — 13,69 złotaha (kala 10,5 rubla).

Vynikovaja suma praduktovaha košyka: 180,2 złotaha. Heta prykładna 140 biełaruskich rubloŭ.

Kolki takich praduktovych košykaŭ mohuć dazvolić sabie biełarusy i palaki?

Zhodna z aficyjnaj statystykaj, siaredniaja zarpłata ŭ Biełarusi da vypłaty padatkaŭ składaje 2 975,8 rubla. Heta prykładna 2588 rubloŭ čystymi. Na hetyja hrošy možna kupić 23,65 takich praduktovych košykaŭ.

U Polščy siaredniaja zarpłata čystymi składaje 6700 złotych (5200 biełaruskich rubloŭ). Na hetyja hrošy možna kupić 37,1 praduktovaha košyka.

• 2
• 0
• 0
• 2
• 1
• 0
• 0
• 0