Літоўскую актывістку, якая пастаянна гойсала ў Мінск, асудзілі да абмежавання волі за адмаўленне злачынстваў СССР
Віленскі акруговы суд у сераду прысудзіў Эрыцы Швянчэнене паўтара года абмежавання свабоды без інтэнсіўнага нагляду за публічнае адмаўленне злачынстваў СССР, паведамляе LRT.
Акрамя таго, Швянчэнене абавязаная на працягу ўсяго тэрміну адбыцця пакарання працаваць або стаяць на ўліку ў Службе занятасці, а таксама неадкладна выдаліць са свайго акаўнта ў фэйсбуку публічны запіс, які груба прыніжае значэнне трагедыі ў Медніках.
Астатнюю частку прысуду Віленскага ўчастковага суда суд пакінуў без зменаў, а апеляцыйную скаргу адваката Швенчэнене Святланы Найдзенка адхіліў.
«Даводзілася, што асуджаная, апублікаваўшы гэты запіс, не адмаўляла факт трагедыі ў Медніках [31 ліпеня 1991 года былі забітыя савецкімі амапаўцамі сямёра літоўскіх мытнікаў — НН], не прыніжала ахвяр, а толькі выказала сваё меркаванне і ўзняла пытанне аб абставінах расследавання справы, абапіраючыся на агульнадаступныя крыніцы. (…) Суд, безумоўна, згодны з тым, што кожны чалавек мае права выказваць свае перакананні і меркаванні, аднак гэтым правам неабходна карыстацца належным чынам», — патлумачыла суддзя.
У лютым Віленскі гарадскі ўчастковы суд асудзіў Швенчэнене за тое, што ў ліпені 2024 года, у 33‑ю гадавіну трагедыі ў Медніках, яна наўмысна, у абразлівай форме апублікавала ў Facebook запіс, які груба прыніжае агрэсію СССР супраць Літвы ў 1991 годзе. За гэта яна была аштрафавана на 3750 еўра.
Эрыка Швянчэнене са сваімі прыхільнікамі па Асацыяцыі «Міжнародны форум добрасуседства» неаднаразова прыязджала ў Беларусь, дзе бралі ўдзел у праўладных мерапрыемствах, а таксама запрашаліся ў прапагандысцкія перадачы, дзе ў якасці замежных экспертаў расказвалі розныя небыліцы пра Літву і Еўрасаюз.
Каментары
( таксама " загончык Беларусі" малы быў)
Да чаго?? На будучыню...і зараз есць журналісты і ні толькі