Аргенціна датэрмінова выйшла ў плэй-оф чэмпіянату свету. З пяці яе галоў пяць забіў Месі
Зборная Аргенціны датэрмінова выйшла ў плэй-оф чэмпіянату свету па футболе 2026 года, перамогшы каманду Аўстрыі з лікам 2:0 у матчы другога тура групы J.
Ужо на пачатку сустрэчы аргенцінцы атрымалі права на пенальці пасля парушэння правілаў супраць Лаўтара Марцінэса. Аднак Ліянэль Месі не змог адкрыць лік, прабіўшы міма варот.
Тым не менш, перад перапынкам капітан Аргенціны выправіў сітуацыю і забіў першы мяч пасля перадачы з левага фланга. Гэты гол стаў для 38‑гадовага форварда 17‑м на чэмпіянатах свету, што дазволіла яму стаць найлепшым бамбардзірам ва ўсёй амаль стогадовай гісторыі турніру.
Ужо ў даданы час другога тайма Месі аформіў дубль і яшчэ больш палепшыў свой рэкорд, давёўшы колькасць галоў на мундыялях да 18.
У першым туры Аргенціна разграміла Алжыр з лікам 3:0 (там, дарэчы, таксама ўсе галы забіў Месі), а Аўстрыя перамагла Іарданію — 3:1. Пасля двух матчаў аргенцінцы маюць шэсць ачкоў і ўжо гарантавалі сабе месца ў плэй-оф. Аўстрыя з трыма ачкамі займае другое месца ў групе.
Чэмпіянат свету 2026 года праходзіць у ЗША, Мексіцы і Канадзе. Упершыню ў гісторыі турніру ў ім удзельнічаюць 48 нацыянальных зборных. З кожнай групы ў стадыю плэй-оф выходзяць дзве найлепшыя каманды, а таксама восем найлепшых зборных з тых, якія занялі трэція месцы.
Каментары