У Мінску затрымалі расійскага арганізатара буйной махлярскай схемы з «папяровым ПДВ». Што за яна?

Паводле версіі следства, праз створаны Осіным сэрвіс толькі ў 2023—2025 гадах прайшлі фіктыўныя вылікі па падатку на даданую вартасць на суму больш за 1,2 трыльёна расійскіх рублёў (каля 15,32 мільярда даляраў). Тысячам кліентаў гэтай схемы ўжо выставілі патрабаванні аб даплаце падаткаў на агульную суму больш за 300 мільярдаў рублёў (каля 3,83 мільярда даляраў).

44‑гадовы Аляксандр Осін быў затрыманы беларускімі сілавікамі ў Мінску, дзе ён, паводле звестак следства, жыў апошнія паўгода. У Расіі яго абвясцілі ў вышук у рамках крымінальнай справы аб арганізацыі продажу загадзя падробленых рахункаў-фактур і падатковых дэкларацый, а таксама аб незаконным абароце плацежных сродкаў.

Схема, якую расследуюць расійскія органы, заключалася ў стварэнні фіктыўных гаспадарчых аперацый. Кліенты атрымлівалі падробленыя дакументы — рахункі-фактуры, накладныя, акты выкананых работ, хоць рэальных паставак тавараў або аказання паслуг не было.

Гэтыя «здзелкі» існавалі толькі на паперы. Кампаніі ўносілі іх у падатковую справаздачнасць і такім чынам незаконна памяншалі суму ПДВ, якую павінны былі заплаціць у бюджэт.

Паводле даных расійскіх следчых органаў, паслугамі пляцоўкі карысталіся дзясяткі тысяч кліентаў, у тым ліку буйныя кампаніі. За арганізацыю такіх схем удзельнікі бралі плату прыкладна 2—3% ад сумы фіктыўных дакументаў.

У схеме, як мяркуе следства, удзельнічалі сотні чалавек. Адныя займаліся пошукам кліентаў, іншыя дапамагалі зніжаць падатковыя выплаты, трэція забяспечвалі сувязі з кампаніямі, падатковымі органамі і праваахоўнікамі.

Цэнтральны офіс групы знаходзіўся ў Маскве, а рэгіянальныя структуры працавалі ў розных гарадах Расіі, у тым ліку ў Санкт-Пецярбургу, Пермі і Белгарадзе.

Сам Осін, паводле следства, да абвяшчэння яго ў вышук перамяшчаўся паміж расійскімі рэгіёнамі і кантраляваў працу сваіх паплечнікаў.

Паралельна ў Расіі расследуецца яшчэ адна падобная справа — у дачыненні да кампаніі «Падатковы доктар», якая прапаноўвала паслугі па «аптымізацыі падаткаў». Следчыя лічаць, што толькі ў 2025 годзе праз такія махінацыі з ПДВ дзяржава магла недаатрымаць больш за 10 мільярдаў рублёў (каля 127,7 мільёна даляраў).

Удзельнікам гэтай групы ўжо выставілі абвінавачанні не толькі па артыкулах аб падатковых злачынствах, але і за ўдзел у арганізаванай злачыннай супольнасці. Аналагічныя абвінавачанні, як мяркуецца, могуць чакаць і ўдзельнікаў схемы Аляксандра Осіна.

• 3
• 0
• 4
• 0
• 2
• 0
• 0
• 0